即巿股評 | 2022-02-24 14:32

【盤房來料】俄烏突爆戰事 暫宜觀望勿入場

俄羅斯突然揮軍進入烏克蘭，俄烏終爆發戰爭，全球股市齊插水，道指期貨喺亞洲市段曾急挫逾800點，港股當然難逃一跌，恒指曾跌逾800點，恒科指再創成立後新低。恒指低開392點，跌幅曾收窄至283點，見23376半日高位，可惜俄烏突爆戰，大市急轉直下，失守23000，半日最多跌802點，見22857半日低位。中午恒指收報22925，跌734點；國指報8033，跌284點；恒科指盤中曾見5067，跌逾4%，再創成立後新低，半日報收5074，跌224點。

藍籌僅4股上升，除咗兩隻油股中海油(00883)同中石油(00857)之外，百威(01876)上季勁賺多6.6倍，半日升2%，新奧(02688)半日升2.4%，藍籌之中表現最好。ATMXJ全線下跌，阿里(09988)傳叫停Lazada上市前集資，盤中曾見104.2元上市後低位，半日跌6.6%，騰訊(00700)半日跌3.7%，美團(03690)則跌逾4%，小米(01810)則險守15元，京東(09618)半日跌半成。

住房和城鄉建設部部長王蒙徽表示，會保持房地產市場平穩運行，但內房股跟物管股全線水，跌超過半成嘅比比皆是，財務狀況好啲嘅跌少過半成已經跑贏整個板塊。汽車股同樣重挫，主要係隔晚電動車股領頭羊Tesla急挫7%，創今年新低，其他汽車股當然要陪葬，輕則跌逾4%，重則如兩隻中概股小鵬(09868)跟理想(02015)分別跌7.9%及6.7%。

金價喺避險情緒高漲下升溫，逼近1950美元，金礦股逆市造好，招金(01818)半日升5.1%，山東黃金(01787)跟紫金(02899)分別升3.2%及1.2%，黃金ETF亦見有資金流入。

俄烏開戰雖然對港股唔應該有直接影響，但港股一向反應過敏，喺亞太區表現今日最差，受戰事困擾，避險情緒高漲下，暫時股市難有運行。目前最大問題係英美歐等多國，會點樣應對俄羅斯對烏克蘭突襲，喺情況未明朗前，暫時離開咗股市嘅資金，短期都唔會咁快重返市場，暫時係眼看手勿動，寧願等大市跌定，至少上返23500呢啲關鍵位，再作定奪。

麥狄文
(徐狄怡‧證監會持牌人)