即巿股評 | 2022-02-21 10:19

【輪證贏家】恒指今早再吹冷風

上個星期五(2月18日)收市後恒指服務公司公布季檢結果，農夫山泉(09633)以大熱姿態成功染藍，但比較估唔到嘅係聯想(00992)「爆冷」，第三次成為藍籌股。大家今日都可以留意下呢兩隻股份走勢。

呢幾日天寒地凍，市區10度都無嘅時候人感體溫覺得得5、6度左右，本身好膽心我家肥貓會覺得好凍，捲埋一舊匿喺我為佢準備好嘅暖暖窩之際，反而呢兩日佢走咗出嚟瞓；晨咁早仲周圍跑，一反以往瞓到你死我活為止嘅「常態」，嘿，到底我養咗隻咩貓。

上個星期五尾市時段果真精彩，應該都係關美團(03690)事，睇返上個星期嘅數，單係美團都令恒指無咗260點；更精彩嘅係臨收市前無聊上FB見到我一位大學同學嘅Post，佢都係同學界中嘅燈神，佢Post出一張喺上個星期五下午2點4x分買入美團嘅Transaction Success嘅相。睇返五分鐘圖嘅話，你會發現美團係大約2點50分嚟料，搭正3點就「大陰燭」向下插到收市為止。同學，麻煩你下次你買完好即刻Share，最多拆返啲比你啦。

今朝恒指都迎來一陣冷風，開市裂口跌多210幾點，拉到去24109點開市，第一層牛證24200至24299點全數死亡，而第二層24100至24199點嘅都唔好過得去邊，爭9點就全數死亡，但都 可以先當呢兩層街貨無晒，咁指數一完U就殺咗1100幾張期指街貨補身。

依家9點41分，喺恒指五分鐘圖上見到指數低開高走嘅情況，所以早早都喺作戰室度話偷位出好倉嘅話動作要快，指數隨時上到50分鐘線(五分鐘圖10線)附近時就會遇阻回落，始終目前指數靠近牛證街貨層，同時日線圖上見到指數都失守埋20天線，下方得返條50天線喺度，而如果由年初至今畫條「上升通道」嘅話，就會發現條50天線同「上升通道」底部都好相近(所以早N個星期喺電台上有講過如果失「三線滙聚」位(嗰時仲係)都無乜所謂，因為仲有呢條線)，基本上，指數再失埋呢條「上升通道」嘅底線的話，咁一浪高於一浪嘅運行模式可以結束。

依家9點58分，五分鐘圖上見恒指同50分鐘線都愈嚟愈近，而Slow STC(14,3)兩線都見到由低位回升上嚟，作戰室裡面今日晨早好倉注基本上都可以先行收割，若然指數喺五分鐘圖上見被條50分鐘線打返落去嘅話，恒指熊(61482)，收回價24800點，同現價有約470點差距，約36倍槓桿夠做DT，當然係可以等五分鐘圖Slow STC(14.3)上返去超買先至出場，但進取嘅、怕等唔到嘅都可以吼恒指上唔到50分鐘線小注出動。

小心五分鐘圖保歷加通道收窄呀！

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。