« 返回前頁列印

即巿股評 | 2022-02-07 13:15

【盤房來料】港股市底逐步轉強 後市仍可睇高一線

放大圖片

雖然美股上周五個別發展,表現平平,但A股今早放完年假後紅盤高開後升幅收窄,拖累港股喺上周五急升近800點後回吐壓力增加。恒指高開36點後,一度升43點見24616半日高位後回吐,A股今早則高開低走,升幅收窄,港股亦隨之回吐,一度跌207點,見24365半日低位,其後跌幅收窄。恒指半日跌76點,收24497;於100日線(24455)附近爭持;國指跌26點,半日報8557;恒科指跑輸,半日跌98點,報5483。雖然今日北水重臨,但半日成交只有670.33億元,唔講得算多,似乎缸邊友仍未擺脫假日情緒,交投偏向淡靜。

藍籌股表現好壞參半,由於俄烏局勢緊張,戰爭一觸即發,刺激油價升至超過7年高位,中海油(00883)、中石油(00857)齊齊升逾2%,係藍籌股中表現最好。中移動(00941)升至11個月高位,半日升1.9%。內銀股全線做好,當中招行(03968)半日升近2%表現最好。不過重磅科技股腳軟,拖累大市升唔起,ATMXJ當中,只有京東(09618)半日升1%最強,其他全部下跌,當中以阿里巴巴(09988)半日跌3.7%最傷,公司日前公布向美國證券交易委員會申請額外註冊10億份ADS,有市場意見認為阿里此舉或部署配股,股價半日受壓。美團(03690)跟騰訊(00700)半日分別跌2.6%及1%。

假期前曾有一浸炒作嘅內地消費股,今日無啦啦插水,海底撈(06862)半日跌2.1%,嚟緊大熱有機會染藍嘅農夫山泉(09633)半日跌6%;阿Man之前推介過嘅海爾智家(06690),今日亦失驚無神跌咗6.8%,失守30元支持位,收市前都唔上返30元支持位,有貨都係走為上着。

經過上周五急升,港股喺100日線附近整固一下亦好正常,只要10日線(24333)跟20日線(24153)仍守得住,後市仍有機會挑戰25000水平,港股市底已逐步轉強,暫時未係做淡嘅時候,反而待大市挑戰25000,若能成功企穩,後市仍可以睇高一線。

麥狄文
(徐狄怡‧證監會持牌人)