即巿股評 | 2022-01-18 10:44

【輪證贏家】資金湧入滙豐淡倉

噚日下半場揀咗隻恒指Put(24516)出嚟，目的就係博恒指日線圖上隨Slow STC(14,3)向下回落，唔貪心，落到50天線就已經夠數，吼五分鐘圖見Slow STC(14,3)上返去超買位時先至落場雖話，基本上喺噚日下晝2點40分至3點呢段時間就可以落場，以當時(24516)高低位做過0.095元/0.094元計，平均買入價為0.0945元。不過，呢啲貨仔隨時都要揸幾日喺手，今朝睇新聞見黑期報升50點，都係開市時先至再算。

恒指今朝開市都係升50幾點，不過，喺開市後見到指數出現高開低走，升轉跌向下，本以為隻(24516)可以安枕，誰不知鏡頭都未轉，指數已經行完佢嘅高開低走，開市五分鐘之後，已經大幅抽高，依家9點41分，指數已經抽升150點，依家24368點，(24516)即刻瘦晒，仲瘦過我病得最勁嗰陣時。由於(24516)係按日線圖走勢而出嘅淡倉，喺日線圖依家見到走勢暫呈「身懷六甲」咁款，噚日同上個星期五嘅高位分別係24408點同24383點，同依家恒指(截至9點45分)高位23485點差唔多，直頭可以喺五分鐘圖上畫到條阻力線出嚟。咁樣啦，如果指數明顯上破呢條阻力線的話，咁(24516)即走無情講啦。

指數要等，又試下向個股埋手。連升N嘅滙控(00005)終於都見到跌幅，今日未算跌好多，截至9點58分止都係跌咗0.3%左右，暫時高位做過55.1元，同噚日嘅高位55元暫時計都可以話係爭一格嘅「平頂」，Slow STC(14,3)兩線超買再超買就唔駛講啦，如以過去五個交易日輪證資金流睇，見到總共有逾2400萬資金流入滙控淡倉(即Put+熊)，以金額計為市場上第二大。咁合理嘅，花無百日紅，市場上都無只升不跌嘅股份，資金咁博係有道理嘅；再加上依家唔只係日線圖超買，連週線圖都已經上到超買位，假設恒指要再升，搵都搵隻追落後嘅股仔嚟落手，易啲嘛。

滙豐Put(22014)，行使價47.83元，今年7月中到期，低引伸、槓桿偏高；熊證唔係唔得，但市場上得返10隻揀，揀遠啲去到收回價59、60蚊嘅，槓桿得返3、4倍，咁...點解唔出Put先？

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。