即巿股評 | 2022-01-17 10:53

【輪證贏家】恒指熊 偷小時圖穿20SMA出場

話說呢幾日天氣又再涼返少少，再加上我住埋啲低漥地區，兩部抽濕機真係輪流開工開唔停；又因為濕凍嘅關係，我家肥家呢排多數匿喺個袋度(我鋪晒之前老媽買比佢嘅暖墊)。終於呢兩日暖咗啲啲又走返出嚟，忽然間發覺佢好似又大個咗咁。

依家9點25分，恒指完U見微升6點開市，報24390點，指數目前喺五分鐘圖嘅走勢基本上沿住上個星期五(1月14日)嘅情況：50分鐘線(五分鐘圖110線)仍然守住指數，而保歷加通道整條仍然呈上，慢慢再推高指數。

望埋牛熊證街貨圖，以今日恒指開市價計，指數仍然都係靠近上方熊證街貨，而熊證第二層24600至24699點仲有成1182張期指，亦係熊證重貨區。至於牛證，今日見係有新上市嘅牛證街貨層，但位置仍然都係喺24000點以下位置，睇嚟牛證要追貼恒指現價，要再新增多兩三層先至得。

雖然係咁，不過指數升咗咁多，要回一回氣都真係合情合理兼健康，依家9點40分，恒指暫呈高開低走，跌緊80幾點，做緊24293點，喺五分鐘圖上指數目前處於保歷加下降通道，而Slow STC(14,3)兩線亦呈下。換小時圖就見指數依家又再次喺20小時線(小時圖20線)之上，作戰室喺開市後見到恒指嘅方向就出淡倉，仲要用到高槓桿嘅熊證，希望做到爬格仔嘅效果；若然見到指數喺小時圖上連20小時線都失埋的話，恒指熊(54509)，收回價24750點，同現價有約360點差距，約45倍槓桿真係做DT好啦，10點後見小時圖上指數失20小時線就偷位出啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。