港股直擊 | 2022-01-12 14:24

【盤房來料】大市收復二萬四靠科技股接力

美國聯儲局鷹派立場稍為緩和，鮑爺話承諾採取行動避免高通脹「根深蒂固」，但言論整體偏温和，美股隔晚扭轉跌勢，三大指數倒升收場。恒指今早成功收復50天線(24043)，升幅更擴大至逾500點，收復24000關企穩，如能企穩50天線，中線走勢可由弱轉強。

恒指裂口高開，升330點見24069已經係半日低位，大市高開高走，而內地公布上月CPI與PPI數據較預期低，市場憧憬內地或放水刺激經濟，喺重磅科技股支撐下，大市反覆向上。恒指半日最多升520點，見24259半日高位，中午恒指收報24241點，接近高位；國指升183點，報8552；恒科指更抽上逾3%，升216點，報5836。半日成交額增至814億元，尚算配合升勢。

藍籌股又算升得全面，話咗金融股唞唞要由科技股接力，今日內銀股及內險股回氣，大笨象(00005)半日升0.7%，港交所(00388)半日升0.8%；另一重磅股友邦(01299)重上80元水平，傳考慮出售部份澳洲人壽保險資產，半日升3.4%。中海油(00883)預告未來三年慷慨派息，每年不低於0.7元，股價裂口高開，半日升近8%。科技股一係唔發力，一發力唔講得笑，今日重磅科技股表現出色。

ATMXJ之中，今日以京東(09618)表現最勁，半日升一成，係藍籌之中表現最好，美團(03690)半日亦升近一成，騰訊(00700)半日升逾2%，已經連升五日。阿里(09988)重上130元水平，半日升4.7%，小米(01810)半日亦升逾4%。其他科技股普遍錄得超過3%升幅，只有半新股商湯(00020)僅升0.5%，似乎喺上市頭嗰幾日激情過後，開始步入平淡期。

話咗內房股千祈唔好高追，雖然央行傳要求國企透過併購支持11房企，但內房股表現較弱，今日整個板塊逆市下跌。中海外(00688)半日跌2.6%，藍籌之中跑第尾，其他內房股閒閒地跌2%或以上。所以內房呢個板塊，就算最壞時間過去，可以揀啲質地好嘅龍頭股嚟收集，都唔好升嗰日追貨，反而回得一兩日低吸仲可以。不過，內房股唔易扭轉弱勢，就算有多餘資金配置，都要有耐性，內房股一段時間之內，走勢都會較為反覆，好難平步青雲，扶搖直上。

麥狄文
(徐狄怡‧證監會持牌人)