即巿股評 | 2022-01-10 13:38

【盤房來料】暫時對港股唔好期望太高

總結上周美股下跌，在強勁嘅就業數據公布後，市場預期加息步伐將加快，高估值股份仍受壓，不過港股呢邊今日無再跟跌，承接上周五升勢，恒指上周四及五兩日共彈586點，成功重收10日(23260)及20日線(23275)後，今日半日進一步做好，半日再升近200點。恒指高開30點，早段曾倒跌94點，見23399點半日低位。其後升勢再現，半日最多升243點，見23737點半日高位。恒指中午報收23687，升193點；國指升95點，半日報8326；恒科指升107點，報5611。

藍籌股普遍向上，但汽車股繼續跑輸，比亞迪(01211)半日跌1.1%，是少數半日逆市下跌藍籌股。創科(00669)半日市跌2.6%，穿晒支持位，暫時唔好多手亂接飛刀。至於金融股維持強勢，大笨象(00005)半日升2.6%，但保險股較弱，友邦(01299)未能企穩80元水平，半日倒跌。

生物科技股反彈，表現最勁竟然係阿里健康(00241)，爆冷成為升幅最大藍籌股。龍頭藥明生物(02269)半日彈3.5%，但留意83-85元阻力大，唔係咁易企得定。至少其他生科股，普遍彈4%至12%不等，跌咗咁多日，反彈都好正常。乳品股及農牧股今日有資金流入，康師傳(00322)半日升3.3%，創52周新高。旺旺(00151)亦創六年半高位，半日升近6%。板塊內其他股份，普遍升幅都超過3%。

至於本周需要注意嘅係星期三中美兩國都公布通脹數據，要留意內地生產者價格指數(PPI)上漲問題會否傳導至消費者價格指數(CPI)。不過中國通脹僅屬溫和，有機會需要進一步減息或放寬幣策，以刺激經濟和通脹。即係中國暫時唔會收緊貨幣政策，甚至仲有機會放水。至於美國去年11月通脹幅度創逾30年以來新高，聯儲局態度轉鷹，美國正啟動加息周期。睇返過往歷史表現睇，美股喺首次加息前數月通常表現良好。而美股將步入業績期，只要企業交出見得人嘅成績表，美股或得到支持。若然中美兩地股市都撐得住，港股料可持續反彈，但24000阻力較大，暫時對港股唔好期望太高。

麥狄文
(徐狄怡‧證監會持牌人)