即巿股評 | 2022-01-05 11:38

【輪證贏家】日線失10天線 恒指熊搵位出動

噚日恒指臨收市前10分鐘，見到五分鐘圖嘅Slow STC(14,3)兩線上到超買至嚴重超買水平，呢啲位少少地吼隻淡倉出過夜真係好吸引。但今日見到恒指牛熊證街貨圖，第一層熊證23600至23699點儲到成過千張期指街貨，繼續做重貨區，有淡倉在手都咪話唔驚，求跌舞未開市已經跳定先。

陪我家肥貓玩咗一陣之後，恒指完U，今朝升33點，開市報23323點，不過，Slow STC(14,3)兩線齊齊再次重返嚴重超買水平，過夜淡倉呢鋪都真係15/16。到正式開市之後，見到指數即時升轉跌向下行，唔單止噚日出淡倉過夜，就連今朝開市嚟追都仲可以追得過，至依家9點49分，恒指跌156點，做緊23132點，求跌舞總算求跌成功。

另外，噚日有喺電台節目時提返隻滙控(00005)(其實keep住幾日都係講跟隻大象)今日開市再見升勢，仲上破埋50蚊呢個位，總算對電台嘅聽眾有個「膠袋」。

換個日線圖見，其實恒指由上星期五(12月31日)至今，指數高位係有稍稍上20天線，但同時下方有條10天線支持，又或者再加上恒指波幅指數(VHSI)向下緊(受長假期 影響也好)，所以指數都Keep住喺10天線同20天線中間。及至今日，指數向下再行而喺10點2分見指數失23100點，換言之第一層牛證街貨23100至23199點全數死亡，不過呢度嘅貨量唔算多，得相當於141張期指，而23000至23099點變相成為最貼價牛證街貨，而呢度都只係得105張期指。近牛比較吸睛嘅係22900至22999點946張期指，擺得喺呢個位咁重即係代表好友覺得23000點會有支持啦。

基本上，以目前恒指日線圖嘅走勢，指數再下行嘅可能性都唔細，恒指熊(66170)，收回價23578點，同現價有約400幾點差距，36倍槓桿其實都可以夠做DT，進取嘅吼恒指五分鐘圖上見未能上破100分鐘線(五分鐘圖20線)可以小注落場，安全嘅、想用日線Trade嘅話，就耐心等下Slow STC(14,3)上返超買水平先啦。

10點10分準備上稿時見到恒指最低(暫時)做過23001點，嘩！好險！

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

想入Patreon/聊天室？Click呢度就得：https://www.patreon.com/cbbcwar

FB：https://www.facebook.com/cbbcwar