即巿股評 | 2022-01-04 14:31

【盤房來料】美股又創新高 港股舉步維艱

人家美股隔晚高高興興又全面向上，喺2022年有個好開始，道指跟標指再創收市新高，但港股呢就繼續弱過藥煲，高開後倒跌，中午叫做險守23200水平。北水回歸，半日成交回升至656億元，上半場最吸睛，仍然係半新股商湯(00020)，盤中一度高見9.7元高位，但半日收市升幅收窄至不足一成，報8.48元，高追咗嘅真係唔好意思，要睇住個vwap價8.9元決定去留。

港股高開125點，半日最多升164點，見23439點，但A股假期復市後受壓，拖累港股由升轉跌，盤中曾倒跌127點，見23146半日低位，半日收市跌幅收窄，總算守住23200點。恒指中午收報23206，跌68點；國指收報8151，跌37點；恒科指跌81點，半日跌5559。

藍籌股個別發展，港交所半日跌1.8%，金融股表現較好，友邦(01299)、大笨象(00005)均見上升，內銀及內險股亦見資金追捧。話就話港股唔跟美股走，但個別概念股亦係受美股相關股份所影響，好似Telsa呢幾日精精神神，連帶比亞迪(01211)都造返好啲，可惜280元阻力大，過唔到阻力，升幅自然又收窄。至於蘋果公司成為全球首間市值達三萬億美元嘅上市公司，帶動蘋概股今早造好，瑞聲(02018)半日升逾6%，但舜宇(02382)先升後回，半日倒跌2%。

內需股今日沽壓大，農夫山泉(09633)失驚無神跌咗一成，呷哺呷哺(00520)亦跌近9%，其他內需股難逃一跌，跌幅由超過1%至超過3%不等。李寧(02331)跌得比較甘，半日跌8%，成為表現最差藍籌股。

美股係就係創咗新高，但疫苗股隔晚仆直，拖累港股呢邊嘅生化科技股急跌，龍頭藥明生物(02269)半日跌7.7%，盤中更一度跌穿80元大關。其他生科股閒閒地跌半日以上，君實生物(01877)跟康希諾(06185)更跌逾一成。美國10年債息再度升穿1.6厘，息差拉闊下，銀行股造好，不過阿Man一向對呢個板塊興趣不大，銀行股雖然睇落息率幾吸引，但小心賺息輸價。

至於一直死死吓嘅內房同物管股，今日見反彈，講真呢個板塊都真係買唔落手住，債務問題未解決，唔知邊時邊日邊個爆鑊，短線反彈就更加追唔過，若然有心長線投資，都係睇住嗰三隻背景同實力較雄厚嘅龍湖(00960)、潤地(01109)同中國海外(00688)，其他次一線嘅內房，未知喺行業整合淘汰賽中，邊個係輸家，暫時都係眼看手勿動。

麥狄文
(徐狄怡‧證監會持牌人)