即巿股評 | 2021-12-23 10:27

【輪證贏家】恒指牛偷位落場

噚日揀咗隻比亞迪(01211)出嚟，仲揀定隻牛仔捉佢日線圖出「曙光初現」上行，見我連牛證個冧把都唔打就知道噚日部咗成日都搵唔到位出隻比迪牛，原本喺星期二(12月21日)喺電台講話唔貪心，上望目標日線140天線先，即今目標已到，都係嗰句：我無做到啫，但都希望有聽到嘅你/有見到呢篇文章嘅你有做到，可以為自己賺多份聖誕禮物返嚟啦。

不過，噚日臨收市時見到恒指五分鐘圖Slow STC(14,3)兩線上到90以上超買水平，所以膽粗且咁喺聊天室度同大家講可以小注入淡倉過夜。今朝起身見到美股升逾200點真係嚇到鼻哥窿都無肉，還好騰訊(00700)玩實物分派京東(09618)，令後者今日開市即跌逾6%，拉低下個市，開市無耐見指數旋即升轉跌，只不過見指數喺五分鐘圖上回落到保歷加通道中軸時，同時見50分鐘線(五分鐘圖10線)同埋250分鐘線(五分鐘圖50線)都好鬼近，三線支持之下指數踩住原位再去，呢注過夜淡倉有少少走難嘅感覺。

依家9點54分，恒指由跌再轉返做升，升68點，做緊23171點，作勢向23200點出發，都啱嘅_，因為23200至23299點就係第一層熊證街貨，街貨量係比噚日少咗啲，但總好過反方向下行至22900至22999點食得嗰13張期指咁少。

日線圖上見Slow STC(14,3)兩線喺超賣水平回升，而指數都叫做連升三日，都可以講話早兩日喺走勢圖上出現嘅「身懷六甲」得到確認，只係問題在時近年尾，愈嚟愈多「芬佬」收爐，見噚日市升但成交額縮到得返唔夠1000億就知，缺水嘅情況下，指數仲有無力再去升先？

恒指牛(61299)，收回價22728點，同現價有約350點差距兼有逾59倍槓桿只限Day Trade，純綷博今日見五分鐘圖Slow STC(14,3)回到底位時，或者指數又再次踩得住保歷加通道中軸時小注落場，偷轉位過下癮阼。

至於隻比迪...過到10天線先再講。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

想入Patreon/聊天室？Click呢度就得：https://www.patreon.com/cbbcwar

FB：https://www.facebook.com/cbbcwar