即巿股評 | 2021-12-22 10:48

【輪證贏家】比迪見「曙光初現」 牛證比貼價Call更靚

噚日揀咗隻恒指Call(17016)，喺朝早10點55分至11點段時間，吼五分鐘圖上見到Slow STC(14,3)兩線落到超賣至嚴重超賣水平時落場，平均買入價為0.12元。之後見指數愈升愈有咗款，不過都set好咗如果指數失守50分鐘線(五分鐘圖10線)的話，就止賺走人。而喺噚日1點35分，指數就跌穿咗呢個位，以(17016)呢段時間高低位做過0.126元/0.125元計，平均沽貨價為0.1255元，對比平均買入價，呢趟平均賺幅為4.58%。誰不知恒指之後再上，仲愈升愈有，最高見過23100點，(17016)沽得唔抵？咁說話又唔可以咁講嘅。

今朝起身餵完我家肥貓食早餐之後，睇新聞見到隔晚美股升成500幾點，雖然牛證的確好重，但以依家恒指嘅擺位嚟講，真係點都近熊證，所以今朝恒指完U開升200幾點，上到23200點樓上，踩入第一層熊證街貨都唔出奇，問題係之後恒指會唔會忽然貪心鬼上身，上行去追殺到23400至24399點嗰700幾張期指咁解啫。

依家9點44分，恒指目前都仲喺高位橫行住，似乎等50分鐘線(五分鐘圖10線)上嚟給力，又試試向個股出發。開始有讀者發現我喺電台做一個好短(五分鐘到掛)嘅晚間節目，呢兩日都有提到一隻股份，就係比亞迪(01211)，睇中佢嘅原因其實只有一個，就係佢真係好鬼殘，日線圖上Slow STC(14,3)兩線出嚴重超賣，噚日仲失守埋條150天線，但係走勢圖上見出咗「曙光初現」出嚟，今日即跟市高開，Slow STC(14,3)都認確到觸底反彈，唔貪心望佢上返300蚊，比返條10天線我都已經心滿意足。

比迪牛(56331)，收回價240元，同現價有約6.25%差距，揀遠啲安全啲，槓桿有約11.64倍，吼五分鐘圖見到Slow STC(14,3)落返去超賣時先偷位入場。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

想入Patreon/聊天室？Click呢度就得：https://www.patreon.com/cbbcwar

FB：https://www.facebook.com/cbbcwar