即巿股評 | 2021-11-16 13:48

【盤房來料】資金輪動 科網跟醫療醫藥股重新受捧

中美元首視象會議成為市場焦點，市場憧憬會談後有好消息公布，不過講真阿Man就無乜期望，咁無期望通常唔會失望。唔知係咪咁，港股反而連升五日，再加埋人仔走強，A股向好，港股創三個星期高位。

恒指高開55點，重返20天線(25426)，早段升幅曾縮水至19點，其後A股造好，人仔走強，港股升幅再擴大，半日最多升275點，見25666點，創三個星期高位。半日恒指報收25658點，升267點；國指升101點，報收9187點；恒科指報6683點，升81點。不過半日成交只有659.24億元，都係未見起色。

隔晚十年期美國債息回升至1.6厘樓上，利率趨升，金融股造好，大笨象(00005)跟友邦(01299)半日升逾1%。內地有報道指多間遊戲公司內部人士爆料，遊戲版號或將在近期恢復審批，騰訊(00700)升1.7%，相關股份好似心動公司(02400)升幅更為顯著。其他科網股亦見資金流入，市場憧憬內地監管近尾聲或已告一段落，加上美國著名對沖基金從新配置相關股份，相信呢個板塊已經見底。

除咗科網股之外，醫療同醫藥股呢兩日亦見資金流入，阿Man愛股藥明生物(02269)有望重返110元水平，而上周四阿Man喺即時策略聊天室提供嘅海吉亞醫療(06078)三個交易日累升逾一成，暫時向住75元阿Man嘅短線目標進發，睇嚟醫療醫藥股板塊，仲可以炒得吓。

雖然中港澳仍未落實全面通關，但市場相信來臨日子不遠矣，而多間博彩企業睇好營業前景，未來業務將有更好表現，濠賭股今日又落鑊。新濠(00200)董事鍾玉文表示，從外國經濟重啟經驗來看，旅遊需求仍存在，睇好澳門疫後復甦步伐；另據《澳門日報》引述永利澳門副主席陳志玲則稱，目前已有超過六成預訂率。金沙(01928)飆6.9%；銀娛(00027)急揚7.1%，兩股為半日升幅最大藍籌；其他濠賭股亦閒閒地錄得4%以上升幅。

物管股今日見反彈，當中保利物業(06049)建議採納限制性股票激勵計劃，股價爆升23.3%，其他物管股亦升4%或以上。另一個今日反彈嘅板塊係餐飲股，內地本地病例回落至一個月低位，海底撈(06862)落咗海底後，今日終反彈4%，不過此股積弱已久，加上蟹貨重重，反彈都係少理為妙，要消化蟹貨需時，家下最多係股價見咗底，估計會一段時間喺接近底部橫行。

麥狄文(徐狄怡‧證監會持牌人)