即巿股評 | 2021-11-02 07:00

【佛系股評】賭博「佛」示錄

上期【佛系股評】揭盅隻最新部署富途牛牛（FUTU.US），原先幾日脹面賺近一成係威係勢，誰知人行京官卻突然踩多一腳話跨境券商提供「非法金融業務」，令牛牛當日市前要跌近三成，一如畢非德所講『Anything can happen in stock markets』。

「非法金融業務」這個指控太嚴重了，依國內法律可以拉人封艇。但做法也真有中國特色，有人犯法，你執法部門去拉去鎖不就行了？偏偏要搞個不點名批評，說白了，就是放你一條生路，溫提你們券商要按京官大老爺的遊戲規則，別去鑽法律漏洞。按此解讀，生意可以繼續做，壞消息可能也似乎盡出。但點都好，永遠記住呢句『Anything can happen in stock markets』就唔會死人。

市場小姐癲起上黎，咩事都可能發生，所以佛系男每次投資決定都會做足buffer，買股票跌三成好五成好甚至停市也好，都會做好心力財力的準備。要係股市長期贏錢，不論你是佛系圖系乜系都好，由買入第一股起應該已計劃好出現哪種情況會再度加注，哪種情況需要認輸離場；按自己的計劃行事，切勿被市場小姐牽著鼻哥走。

咩叫唔好被市場小姐牽著鼻哥走呢？如果大家稍有賭性，應該知道長期機率的重要性。簡單講，就是擲銀仔時即使連續開十舖公，也不會影響每一局公字機率都是五十五十。如果你眼見短期出現長尾現象而棄守長期機率，咁你就係被市場小姐牽著鼻哥走的那些人。

佛系男當然唔係教大家賭錢，但如果你想在股市做長勝將軍，學怪賭博的基本技巧及數學比你讀幾年金融碩士有用得多。本人家中就有幾本賭書，其中一本是《The Mathematics of Poker》。一般人以為賭錢係靠運氣時，不妨Google下有多少專業賭徒是年年贏錢贏到要做稅務規劃。這些在賭枱長勝的專業賭徒都有些共通點，例如專注長期機會率、無視或利用短期事件、每刻盤算自己手牌和其他玩家牌局的贏面、選擇性適當地放棄某些牌局（即使贏面大）、選擇冒險是基於風險回報決定。

套用到股市，上年疫情初爆令全球工廠停工，船務停運，石油倒貼都無人要，這些短暫的供需失衡造成價格急跌。但長期機率根本沒有多大變化，衣食住行科技發展等基本經濟活動仍然運行。但因為曾一度積壓需求便有如壓彈弓般，又造成另一面的短暫供需失衡，搞到物價騰飛。經濟循環就是不斷出現這種鐘擺現象，佛系男認為，鐘擺效應運用到政經大勢比運用在股市升跌更有奇效。以用電影來打個比喻。股市就像是面銀幕，每秒投射出來的價格都夾雜多多少少雜音亂影，當然都是齣戲的一部分，而且很有娛樂性；但再花巧的電影橋段也必定要依循故事骨幹。專業賭徒、佛系投資、長勝將軍，都是沉悶地著眼故事骨幹來下注；Ms Market就隨電影橋段忽喊忽笑。

回想兩年，當畢非德在油價負數時增持Occidental Petroleum (OXY.US)時，你買緊定賣緊？如果說炒石油期貨或者單一油股好大風險，咁你又有無留意到同樣嚴重受油價影響的俄羅斯股市在12個月內急升八成？同期標普也只是升三成。

這些長期機率其實都只是no brainer events，類似的鐘擺現象你和我都可以輕易把握。但點解賺錢既人咁少？唔通佛系男真係特別叻咩？咪因為大部分人都抵受唔住短期雜音影響囉。如果你們真金白銀放入股市為了貪過癮、睇場戲般感受氣氛，我縱使有神通法力都幫你唔到。

講左咁多，石油、航運、製造等行業已完成鐘擺循環；咁而家有咩行業正被短期事件擠壓，偏離了長期機率呢？歡迎大家繼續討論。

梁樹德

筆者先後修畢哲學、心理學、經濟學、企業管治和工商管理等碩士課程，在證券分析、企業戰略計劃、投資者關係工作及財富管理等方面有豐富經驗。在亂世末法的此岸，奉經論典籍為圭臬，心若浮沉，淺笑安然。筆者是證監會持牌人。

(編按:《佛系股評》將會逢周二市前上載於信報網站)