港股直擊 | 2021-10-29 10:19

【輪證贏家】恒指熊望殺25300點牛證

嚟到10月最後一個交易日，恒指喺噚日期結出現下行，都過都無乜所謂嘅，一來真係無人話過期結日恒指一定升；二來以目前恒指日線圖計，睇淡嘅都可能下望住50天線，即大約25300點，將呢個位喺牛熊證街貨圖上嘅話，就相當於牛證嘅第二層25300至25399點，呢度有相當於841張期指，係牛證第二重貨區。而以噚日恒指收市價25555點計，目前指數仍然近牛證街貨層。依家9點17分，仲有3分鐘開市，我家肥貓開始瞓覺，望住佢我都覺得開心，成日唔係食就瞓，一係就玩，當然大前題係有個屋企比佢住先啦，其實我都幾想知佢以前喺街生活嘅時侯係點，佢會覺得好自由，還是每日都擔驚受怕被人趕？

嚟到9點25分，恒指做完U盤報出開市價為25466點，跌88點，本身指數已經靠近牛證街貨層，依家開出嚟呢口價直情踩咗入牛證第一層25400至25499點，呢度有相當於296張期指。睇返恒指五分鐘圖見指數今早裂口下跌，Slow STC(14,3)都由噚日兩線處於80以上超買水平向下回落；再換埋個小時圖見，指數仍然受制於10小時線，而Slow STC(14,3)雖然出咗超買再超買好，不過今日見%K線再次跌穿%D線，且回落幅度有啲明顯。假指數要繼續向下，小時圖計再落就可能見100小時線，咁啱依家見100小時線嘅水平就係25301點。所以，早在未正式開市之前已經喺聊天室講定開市後可以追淡倉，先博指數五分鐘圖Slow STC(14,3)落返去超賣，進取嘅就再博指數殺25300至25399點牛證。

正式開市之後，恒指首五分鐘見指數大部份時間都處於開市嗰口價徘徊，去到9點36分先至明到明顯嘅跌幅，恒指熊(64977)，收回價26127點，同現價有逾600點差距，約31倍槓桿夠DT用。依家9點41分，恒指數低暫時做過25314點，怕且都要等等五分鐘圖指數回返上100分鐘線(五分鐘圖200線)或者Slow STC(14,3)上返超買水平先有位落場啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

即市聊天室/Patreon：https://www.patreon.com/cbbcwar
FB：https://www.facebook.com/cbbcwar