即巿股評 | 2021-09-30 14:03

【盤房來料】長周末前無心戀戰 觀望下周施政報告

隔晚美股表現反覆，聯儲局暗示最快11月啟動縮減資產購買步伐，市場對「收水」預期升溫，刺激美元強勢，美滙指數處於近11個月高位；10年期美國國債孳息率則企穩1.5厘以上。鮑爺喺國會聽證會上表示，通脹持續時間較預期長，言論「偏鷹」，令美股再難以維持持續上升嘅強勢；加上內地今早公布9月官方製造業採購經理指數(PMI)降至49.6，遜於市場預期，亦令港股偏軟，雖然今日係季結，但表現都係較為反覆。明日假期，長周末效應下，同埋北水缺席，半日成交縮水到只有551億元。

恒指開市跌169點，盤中跌幅曾擴大至316點，見24346點半日低位，其後跌幅曾收窄至73點，見24590點半日高位，但中午報收24450點，半日跌212點。國指半日報收96點，報收8663點；恒科指半日報收6068點，跌111點。

藍籌股偏軟，大部份均見下跌，友邦(01299)係半日少有逆市上升嘅重磅藍籌股。港交所(00388)、李寧(02331)、藥明生物(02699)等亦見上升，而金沙(01928)跟銀娛(00027)則繼續反彈。至於AMTX表現強差人意，美國科技股表現疲弱，港股呢邊嘅科技股當然亦無好日子過。

人行及銀保監強調內房穩健，內房股有反彈，而負債比率高嘅富力(02777)跟融創中國(01918)半日分別彈12.2%及9.5%，前者獲大股東注資，財政壓力得以緩解。不過，內房股反彈還反彈，恒大(03333)事件未有解決方案前，整個內房產業仍不穩定，暫時都係眼看手勿動。恒大半日先升後回，要睇集團旗下資產有冇同業肯接收，仲要價錢唔好太過賤，否則恒大系都係瓜多過菜。

至於本地地產股之前因為市場擔心共富概念下，地主佬或要為增加房屋供應負起責任，而捐出農地，或跟政府合作發展平價住房係有可能發生嘅事，市場觀望下周施政報告有關地產房屋政策。不過經過之前嘅急跌，本地地產股反彈都係合理，加上新一批消費券明日發放，有助刺激消費，對有商場收入嘅發展商嚟講係好事。

麥狄文
(徐狄怡‧證監會持牌人)