港股直擊 | 2021-09-20 10:17

【輪證贏家】小熊快線再出發

依家9點5分，又係我家肥貓準備瞓覺、我家老爺準備出門嘅時間。

趁未開市時又望望個牛熊證街貨圖先，以上個星期五(9月17日)恒指收市價24920點計，目測就似指數企咗喺牛熊街貨中間，都係計一計最穩陣。以牛證最貼價層24400至24499點，同熊證最貼價層25500至25599點計，中間價就係(24499+25500)/2=24999.5點，同上個星期五收市價比較，算叫做企喺中間，只係數值上近牛證街貨。

還記得上個星期五喺恒科指上畫咗個「頭肩底」，仲有一個似疑「早晨之星」嘅物體出現，畫嗰時因為嫌最後嗰支陽燭嘅身唔夠大，所以只可以話係似疑。不過，上個星期五不論恒指定係恒科指，都見到跌幅有所收窄，所以今日返嚟見到恒科指嘅「早晨之星」幾可確認；再加上Slow STC(14,3)兩線已明顯低位回升咗上去，只係上個星期五見恒科指五分鐘圖係咁上，偷位博入Call根本都無位比你入。不過，到完咗U盤之後，恒科指開市報6379點，跌72點；而恒指就跌280點，開市報24640點，應該幸慶指數無位比我入。

依家9點37分，恒指跌幅擴大至逾500點，跌544點，報24376點，換言之恒指牛證第一層街貨24400至24499點全數死亡，呢度有相當於581張期指數街貨，而目前踩住嘅24300至14399點就有相當於756張期指，再向下望多層，即24200至24299點就有成970張期指，望望月曆北水要星期四(23日)先返，師傅教落：跌市容易升市難，因為升市需要承托，再加上今日先恒指熊證最貼嘅收回價落到去25034點，即係話聽日返嚟最近見熊證街貨層係25000至25099點，同現價比嘅話，都仲有600幾點嘅差距，同步再估繼續有資金流入牛證博反彈的話，整個牛熊證街貨圖又會變成現價近/踩入牛證街貨層、熊證距離現價幾條街、近牛為博反彈而儲落唔少街貨。

嚟到9點46分，恒指最低暫時見過24269點，首兩層牛證街貨全數死亡，夾埋有相當於1337張期指嘅牛證已被強制收回。喺五分鐘圖上只見今朝一個大裂口伴隨一支「大陰燭」向下插，Slow STC(14,3)目前兩線位處於10嘅超賣水平範圍，不過仲未見到%K線有向上回升穿%D線嘅跡象，而小時圖則見指數喺上個星期五最後一個鐘上到保歷加通道中軸之後未能成功破位，同見大裂口向下，Slow STC(14,3)亦於中軸水平已急轉彎向下游走，目前指數處於保歷加通道底線，同時開始見到保歷加通道口有拓闊嘅情況，似乎想比位指數繼續向下，唔通個市今日要踩到落到24000至24099點嘅逾1300張期指街貨嘅牛證重貨區先至安落？

恒指熊(66037)，收回價25054點，換股比率12000，所以槓桿有29.44倍，喺貼價牛堆之中最高，吼返恒指五分鐘圖指數上唔到50分鐘線(五分鐘圖10線)或者100分鐘線(五分鐘圖20線)先至進場。

估唔到小熊快線上個星期五真係埋咗去加油站，而唔係總站。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

Patreon：https://www.patreon.com/cbbcwar
Facebook：https://www.facebook.com/cbbcwar