港股直擊 | 2021-09-06 10:40

【輪證贏家】恒指Call博小時圖STC反彈

上個星期五(9月3日)返番去舊場參加一個台長嘅Last day party，場面墟冚致極，連第一代嘅同事都有返嚟，忽然由Last day party變成了一個眾舊Party，Anyway，「All the best」呢句說話喺幾時同對住邊個都係最適用，但係真心嘅。

今日係聊天室休息嘅第一日，將會休息一個月之後先再戰江湖，本以為可以專心做好今日嘅稿件，誰不知依家10點未到，樓上裝修又開始鑽嘢；嘈住我打稿我都忍你，依家係嘈住我家肥貓瞓覺呀！

依家見恒指升緊百零點，暫時最高做過26076點，呢個點數仲喺五分鐘圖做咗「平頂」出嚟，正常手痕入淡倉嘅時候，望望個小時圖，見到指數今日剛好踩住小時圖上嘅保歷加通道底線，又咁啱Slow STC(14,3)喺低位回升，而依家粒燭就彈返上保歷加通道中軸水平，「咁快彈返上去中軸？」係呀，因為本身保歷加通道都唔係好闊嘛，以呢個走勢圖嚟睇，似乎出淡倉都真係偷位爬格仔策略。

又望望個牛熊證街貨圖先，兩邊都有新增街貨層，牛證最貼價層為25800至25899點，而熊證最貼價則為26100至26199點，中間位就係(25899+26100)/2=25999.5點，以依家10點10分計，恒指做緊26016點，數值上係近上方熊證街貨，但亦都可以話算叫做企喺中軸位，畢竟牛熊兩邊街層又近咗；指數會唔會以小時圖走勢向上再衝，似乎都要睇返保歷加通道會唔會拓闊，比更多嘅空間指數再上。

返轉頭再睇返恒指五分鐘圖，見指數高位又見26083點，目前仍沿50分鐘線(五分鐘圖10線)向上運行，同步見Slow STC(14,3)於70幾呢個位%K線又上破返條%D線，之前見到嘅「平頂」將指數向下打返落50分鐘線呢一下似乎已經功德圓滿咗。觀乎五分鐘圖沿50分鐘線上行，再博小時圖企得返上保歷加通道中軸的話，恒指Call(21566)，呢隻有啲熟口面，好似之前推過，不過今日見佢引伸同槓桿都仍然吸引，翻啅又何況？行使價為26500點，屬輕微價外Call，低街貨亦是另一賣點。進取以恒指五分鐘圖見50分鐘線有支持則追入；安全嘅當然可以等返五分鐘圖嘅Slow STC(14,3)回返落去超賣水平先至出手。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

Patreon：https://www.patreon.com/cbbcwar
Facebook：https://www.facebook.com/cbbcwar