港股直擊 | 2021-08-10 11:02

【輪證贏家】殘圖港鐵add入watch list

繼續港股開市，肥貓瞓覺嘅日子，不過今日中午又約咗班戰友出去lunch兼聚下，依家9點30分，出面個天鬼死咁黑，睇嚟都要帶定把遮出街(話口未完又落雨)。

恒指今日都好似黑黑地咁，開市升173點之後就見高開低走，五分鐘圖上見指數好快回返落去最近嘅250分鐘線(五分鐘圖50線)附近，本以為恒指彈到上近熊證街貨區時會順勢再上，殺熊證街貨，不過暫時未見呢個情況；再去到9點42分，恒指升幅又收窄咗少少，喺五分鐘圖上見指數依家退到落去500分鐘線(五分鐘圖100線)，似乎暫時有喘定嘅情況；又再去到9點50分，指數已經見倒跌，再追落的話就要睇五分鐘圖上保歷加通道口有無拓闊比位恒指落啦。

望望個股，今朝成堆科網股跑贏大市，騰訊(00700)同美團(03690)都有升逾4%，京東(09618)都有2%嘅升幅，而隻屢創新低嘅快手(01024)則有8%升幅，反而聽日(8月11日)公布業績嘅港交所(00388)就向下插緊，唯於日線圖上見港交所股價似有20天線做支持，但同步見Slow STC(14,3)兩線勢頭剛剛向下且%K線穿咗條%D線，哼！隨時連條20天線都無埋。

嚟到10點11分，指數已向下，恒指由升轉跌，跌緊106點，報26176點，五分鐘圖上都見保歷加通道口拓闊，猶幸今朝9點45分左右喺聊天室叫大家小注試開淡倉，到依家可能水位無一開市出淡倉咁正，但以爬格仔心態嚟講，都係有正數嘅一注；只不過係擔心緊如果小時圖條保歷加通道口唔拓闊嘅話，咁恒指今日隨時又玩swing trade，swing trade無問題，問題在於個swing嘅幅度夠唔夠trade啫。

講起業績，今個星期除咗隻港交所之外，後日(星期四，12日)仲有銀娛(00027)同埋港鐵(00066)，如果純以走勢圖嚟秤嘅話，坦白講港鐵日線圖真係比銀娛更殘，事關港鐵日線Slow STC(14,3)兩線已經落到超賣至嚴重超賣水平，當然到依家都仲未見兩線出現觸底回升啦。望者堆天線同保歷加通道，見到以目前股價位置睇，下方有50天線、100天線同保歷加通道底線，三線水平相約，一旦三線滙聚，再加埋Slow STC(14,3)準備好回升的話，港鐵都應該冷吼得過。

港鐵又真係有Call嘅，不過似乎依家bookmark佢入watch list好過咁早出手，搵位入市同對隻貓咪一樣，比啲耐性啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN