港股直擊 | 2021-07-26 10:56

【輪證贏家】即殺七層牛證街貨 恒指仲有無得跌？

奧運嚟到今日已經係第四日，你哋又睇咗幾多項賽事？熟悉我嘅朋友都知道我家老爺嘅工作係乜，所以由奧運開幕到依家，唔好話其他節目，就連新聞都無乜點睇過，我都只係睇間中喺 fb上見到人哋share出嚟嘅新聞：河南暴雨康師傅(00322)倉庫坍塌沖出30萬瓶飲料民眾洪水中瘋搶、羽毛球運動員伍家朗因未有授權可以印區旗(根本連sponsor都無)上戰衣掀風波，世界果然如同以前讀新聞學話齋：一日未死，一日都有新聞。「忙到咁？連新聞都真係睇唔到？」咁我本身都有兩樣嘢忙緊嘅，第一樣係籌備咗一年有多嘅一書四冊新電子書終於都上架，依家仲爭最後一個電子書架嘅approval，都搞掂埋嘅話就可以正式出街；第二樣嘅係之前咪話申請領養嘅，終於都成功啦，嚟緊星期六會接貓貓返屋企，所以有時間weekend準備好貓貓需要嘅用品先。

上個星期五(7月23日)朝早落咗隻恒指熊(68441)，揸貨到晏晝見到恒指五分鐘圖又再戀住保歷加通道中軸，破又破唔到，落又唔想落咁落，呢個情況由下晝1點30分去到2點5分都仲見到，成個聊天室都瀰漫住一片「唔通個市又要橫行到收市？」嘅氣氛，頂唔順悶得滯離場的話，按呢段時間(68441)高低位做過0.064元/0.067元，平均沽貨價為0.0655元，一計之下都有10%賺幅。本來見到2點10分打後恒指五分鐘圖見指數上破保歷加通道中軸，就連條Slow STC(14,3)都搶高埋，以為自己走得靚；誰不知去到下晝2點50分，恒指回落返去保歷加通道中軸以下水平，踏入收入前最後一個鐘，恒指好似參加咗三米彈板咁，指數一直向下插至3點20分見全日低位27222點，(68441)咩環境都唔想再睇。

依家9點39分，恒指今朝大裂口低開496點，開市報26825點，日線圖上已見指數大裂口之下再處於250天線以下水平，早早喺聊天室同大家分享新電子書單嘢之後，就順便叫大家搶淡倉，因為五分鐘圖至小時圖Slow STC(14,3)勢頭都仲係向下且未到超賣水平；結果頭先再reload一下個走勢圖之後，見指數跌幅進一步擴大至跌逾600點，9點41分見跌緊687點，報26634點，再望望牛熊證街貨圖，見到恒指一下子殺咗七層牛證街貨，今朝不消15分鐘total食咗相當於3238張期指，然後，我無勇氣去睇(68441)依家個價...

嚟到10點9分，見到恒指跌幅有收窄，不過拆開五分鐘圖就見到指數同50分鐘線(五分鐘圖10線)仲有啲距離，雖然話今早叫定聊天室嘅戰友一開市就搶淡倉，但呢種情況應該同一班阿太企喺超市裡面，一邊吼住買邊盒餸，一邊企喺度等到六點，職員一貼特價貼紙，阿太就即刻將盒餸放入購物車一樣，只不過係今朝淡倉應該啲價被搶到貴晒，根本無特價可言。嚟到依家等指數跌定回調再向下插過先至再追淡倉都唔係無可能，但就要等恒指喺五分鐘圖上出現受天線阻力調頭下行先得囉。

依家10點13分，見五分鐘圖50天線終於都掂住咁恒指啦一旦指數唔過，恒指熊(50207)，收回價27160點，市場上第二隻貼價熊，同現價有逾400點差距，全場最高槓桿約44倍，Day trade夠用架啦

《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN