即巿股評 | 2021-07-14 13:35

【盤房來料】平台股短期難搞 轉吼傳統科技股

美股隔晚自高位回落，市場觀望美企業績，三大指數回吐，港股反彈三日後，今早亦回吐逾百點，暫時受制10日線(27909)，二萬八關更未能收復。恒指高開1點報27965，即見半日高位，受A股下跌拖累，港股跌幅擴大，半日最多跌254點，見27708半日低位，隨後跌幅收窄。恒指中午報27801點，跌161點；國指跌44點，報10068；恒科指升28點，半日報7688。

藍籌股普遍回軟，友邦(01299)跟大笨象(00005)分別跌1.8%及1.4%，平保(02318)更跌2.7%。藥明生物(02269)發盈喜，半日反彈7.5%，成為最大升幅藍籌股，其他醫藥股跟隨做好。快將拆細每手股數嘅微創(00853)半日升8.6%，預計拆細後吸引更多買家入場，拆細前偷步炒高。其他醫藥股普遍反彈至少3%。平台股個發展，騰訊(00700)反彈1.2%，美團(03690)則跌近2%。連登契媽話中國科技股估值將繼續走低，因為監管問題困擾，令到資金不得不離開呢類股份，從而令估值受壓。既然平台股近排無得諗，反而啲較為傳統嘅科技股，好似軟件股同通訊設備股或5G設備股，或者可以吸返由平台股流出嘅資金。而要避埋內地政策風險，阿Man就留意緊似乎又想創新高嘅新意網集團(01686)。

新意網集團日前公布，與一個超大客戶簽訂一份總IT電力容量達10兆瓦嘅新合同，大摩就出咗報告話睇好香港數據中心市場，因香港市場入門檻高，新意網呢類本地領先企業受益最大。報告喺上星期發表，話估計新意網股價60日內會升，畀咗個增持評級佢，目標價就9.4元咁話。

其實之前高盛都出咗報告唱好新意網，建議買人，目標價更進取睇10.8元，即係相對現價仲有接近三成上升空間。而高盛睇好新意網有三個主要原因，其中係數據需求不斷上升，所以香港數據中心需求亦相繼上升。第二個原因係 新意網穩固嘅產能擴張計劃，預計公司嘅數據中心空間將於明年年底增加一倍。雖然競爭環境激烈，但新意網不僅可保持其份額，更加可以喺產能擴張下，提高市場份額。最後一個原因係 新意網目前股價處於過去3年歷史區間嘅中期估值，與同業相比，公司正追趕增長，具有更高利潤率，新意網嘅目標價 與近期亞洲數據中心交易，及中國同業目前估值處於接近水平。兩間大行齊齊唱好，不妨望多兩眼。 

麥狄文
(徐狄怡‧證監會持牌人)