港股直擊 | 2021-06-23 10:46
本以為行到去屋企樓下街市裡面報紙檔買份《蘋果》最穩陣(因為我估大多數人都係去便利店度買),誰不知今日連個報紙檔都賣晒,一路行去地鐵站時忽然醒起站內有一間唔太起眼嘅便利店,諗住博一博,真係仲有成幢喺度,不過買嘅人都有成堆。
博,有一半機會成功;唔博,就肯定乜都無,好似噚日喺下半場揀咗隻恒指熊(52174)出嚟咁,本身打算吼恒指五分鐘圖會否上破50分鐘線(五分鐘圖10線)不破先落場,但以Patreon出文時間2點28分計,當時恒指五分鐘圖已經上破咗條50分鐘線,所以都喺FB講埋變陣等條100分鐘線(五分鐘圖20線)。最終喺2點50分至3點5分見到指數未能成功上破100分鐘線,再比多五分鐘,去到3點10分,見到指數跌穿埋50分鐘線,呢段時間出動噚日隻高槓桿(52174)的話,按其高低位0.035元/0.041元計,平均買入價為0.038元。
其後恒指一直沿保歷加通道底向下運行,同步Slow STC(14,3)都向超賣方向出發,及至臨收市前20分鐘,見指數跌勢有加速情況,至收市前五分鐘Slow STC(14,3)兩線已經跌到入個位數嘅嚴重超賣水平,即日swing trade動作完成,呢個時侯可以將(52174)沽走,按收市前10分鐘(52174)高低位做過0.058元/0.051元,平均沽貨價為0.0545元,由於(52174)係高槓桿熊證關係,所以呢一下嘅賺幅拉高至43.4%。
今早起身個天keep住好黑好暗,日子難過唯有迎難而上,恒指都係一樣,今早開市先升158點,報28468點,喺五分鐘圖上見到指數稍為向下un落接近100分鐘線後又再彈高,Slow STC(14,3)未到底亦見再上行,到依家10點5分,恒指升幅略為擴大至升196點,報28506點,聊天室戰友早已為追升做晒準備。
Day Trade耐少少的話可以先留意小時圖,今早都見指數同Slow STC(14,3)同步向上,依家出咗第二粒小時圖嘅燭都係陽燭,不過就愈嚟愈近保歷加通道中軸水平,由星期一(6月21日)至今指數都未重返保歷加上升通道,比啲時間留意一下小時圖會否繼續受制於保歷加通道中軸而令指數keep住喺保歷加下降通道裡游走。
恒指熊(52131),收回價28850點,同現價有約420點差距,同一收回水平中槓桿最高,重申留意小時圖上保歷加通道中軸呢條界線呀!
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
Facebook:https://www.facebook.com/cbbcwar
秒投聊天室:https://bit.ly/31HG6AN