即巿股評 | 2021-06-22 13:56

【盤房來料】新股熱潮再現留意越秀服務

隔晚美股反彈，市場已消化儲局由鴿轉鷹，而債息未見抽升，即係加息都係講住先，2023年仲有一段時間，有理無理炒住先。恒指高開86點報28575，最多曾升90點，半日高位28579，其後曾倒跌125點，低見28363，但A股回勇，港股收復失地，最終恒指半日微升不足1點，收28489；國指中午收報10518，跌29點；恒科指半日跌108點，報7847，主要係重磅科技股唔多精神。

藍籌股中金融股反彈，不過ATMX四大巨頭腳軟，抽住大市後腿。石油股繼續走強，清潔能源股則延續升勢。講到最厲害今日要數醫械股，內地噚晚公布人工關節集中帶量採購，市場分析稱入圍規則對比支架方案較溫和，相關股份齊爆上。愛康醫療(01789)爆升27%；春立醫療(01858)中途停牌，停牌前勁升36%；康基醫療(09997)升15.2%；威高(01066)大升12.4%；微創(00853)升近一成已算升得少。

踏入6月IPO再度活躍，而上周首掛嘅時代天使(06699)再次掀起新股熱潮，缸邊又開始埋首研究新股。已於噚日截飛嘅越秀服務(06626)，IPO首日已獲孖展超額認購，今日稍後時間會有定價及IPO結果，公司將於下周一首掛。先唔睇IPO結果係點，單係基石投資者陣容已相當夠睇頭，包括新華資產管理、嘉信金融集團、金蝶、商湯科技、升輝控股、深圳凱爾漢湘實業、華科資本及尚慧企業在内10家機構及個人投資者。

10家基石投資者按發售價認購總額最多7.772億港元嘅發售股份數目，基石投資者最高認購總額約佔最多集總額的32.2%。足以反映基石投資者睇好公司前景。

越秀服務係中國物管行業中為數唔多嘅TOD綜合物業管理公司，亦係粵港澳大灣區提供綜合物業管理服務主要市場參與者。不僅如此，越秀服務更加係港股物管板塊中為數唔多而擁有三大國企做股東嘅綜合物管公司。

TOD(Transit Oriented Development)模式，係以公共交通為導向嘅綜合發展模式，一般以地鐵、輕軌、公交等公共交通為中樞，以5-10分鍾步行路程為半徑嚟建立集辦公、商業、文娛、教育、醫療、居住等於一體嘅綜合型社區。

越秀服務主要股東越秀地產(00123)係國内較早一批涉足TOD模式房地產開發商，亦係國内最大嘅TOD發展商之一，截止2020年末越秀地產共開發咗5個TOD住宅項目，總建築面積近400萬平方米。

值得一提的是，TOD物業管理服務模式較傳統住宅及商業物業不同，準入門檻較高，一般不具備較強品牌實力及相關資質嘅物管企業好難涉足該領域。

越秀服務嘅業務已覆蓋全國近20城，形成以粵港澳大灣區為核心，以華東、華中、北方、西南區域為重要支撐嘅全國化佈局。深耕粵港澳大灣區嘅越秀服務，依託政策紅利及粵港澳大灣區人口不斷湧入以及居民消費升級，公司大灣區内物業及相關管理服務業務取得高速增長。

集團同時得到越秀集團、越秀地產、廣州地鐵嘅支持，喺住宅物業管理、專業化商業運營服務及TOD綜合物業管理三大領域，已經具備諸多先發優勢。公司成功上市集團後，開通融資渠道、品牌實力增強、透過收購策略穩健推進，越秀服務喺三大領域優勢及影響力下，盈利能力可領跑行業，值得留意。