港股直擊 | 2021-06-11 14:23

【盤房來料】5月通脹數據反映急劇通脹為短期現象

市場一直等待嘅美國通脹數據隔晩終於公布，雖然5月通脹數據創13年高位，通脹威脅步步逼近，但美股並未退縮，反而標指隔晚再創新高，道指仍保持升勢， 納指更升逾百點。至於港股連跌七日後，今日總算識得彈一彈，但仍受制10日線(28970)。

恒指高開126點，最多曾升226點，見28965點半日高位，不過仍受制10日線，升幅一度收窄至僅餘4點，見28743半日低位。其後A股跌幅收窄，為港股注入動力，半日恒指升逾百點收市。恒指中午報收28851點，升112點；國指報收10729點，升13點；恒科指變化有限，點1點。長周末前大市成交維持淡靜，半日成交額只有682.7億元。

通脹持續升溫，隔晚油價升至逾兩年高位，三桶油全部上升，中石油(00857)更升逾4%，連帶油服股亦有追捧。燃氣股亦跑出，新奧能源(02688)創新高，半日升3%；其他燃氣股升1%至6%不等，要數落後燃氣股，批股價急跌嘅中國燃氣(00384)算係代表，公司接連回購，可惜仍未能升破30元阻力回補裂口，今轉燃氣股落鑊，即管睇睇有冇幾會借勢炒返轉。不過今日星期五，又係長周末假期前夕，都係咪咁多手，至怕今日炒高，放完假返嚟又無晒影。
藍籌股個別發展，乏善可陳，隔晚納指表現唔錯，但香港呢邊嘅科技股就表現平平，ATMX半日表一般，只有美團(03690)升2.6%，叫做好些少；阿里(09988)半日跌逾1%。領展(00823)半日升0.5%，盤中則創一年高位。

雖然唔少人認為美股位高勢危，通脹殺到之後，高增長股唔無有運行，不過值得留意係評級機構穆迪數據顯示，去年美國非金融業現金持有量暴增32%至破紀錄嘅2.15萬億美元(約16.77萬億美元)，總額較2007年增加兩倍；隨住企業信心提高，預料會喺資本投資、派息、購併及股票回購上投入更多資金。而持有最多現金嘅企業包括蘋果公司(Apple Inc.)、微軟、亞馬遜和Facebook。按行業計，科技業持有最多現金，達8880億美元，佔總數41%，之後係零售、醫療與製藥，以及製造業。單係呢筆天文數字嘅現金，一旦投入市場，美股始終易升難跌。

再仔細分析隔晚美國嘅通脹數據，推升5月CPI增幅的主力來自二手轎車和卡車價格急升，環比上升7.3%，佔總漲幅的三分之一。斷估聯儲局唔會因為二手車漲價而加息。此外，隨著疫苗接種率提升，疫情減輕，經濟逐步重啟，消費者積壓多時嘅消費力快速釋放，需求爆升但供應大減，價格自然會喺短期內爆升。不過，正如此前不斷有聯儲局官員強調，急劇通脹都只係暫時性。隨著商品供應鏈回復正常，價格也會恢復到正常水平。另外，目前價格短暫上升喺因為政府補貼、居民儲蓄上升以及長期留喺屋企避疫，累積嘅出行需求共同造成，而消費者願意為呢啲原因長期增加花費嘅時間唔會持續太耐。

麥狄文
(徐狄怡‧證監會持牌人)