港股直擊 | 2021-06-07 10:54

【輪證贏家】出動熊證因為重牛街貨

話說返番觀塘都有成個月，對面街係我八年前嘅舊公司，當年識嘅人大部份都走晒，仲有兩三個老臣子仲喺度，其中一個仲係我以往嘅飯腳，貴為N年前日本早稻田大學大學嘅高材生，寫咗公司同人物專訪幾廿年，佢啲嘢真係好好睇。噚日whatsapp，一傾連佢都意興闌珊，枉我仲間唔中會收到啲message喺呢個舊場請Content人，無計，鬼叫佢賣咗盤又請咗個唔識財經嘅人返去做head of content咩，呢鋪真係神都死；還好仲有個前飯腳喺度。

依家10點3分，開市時見恒指都仲係綠燈，到搭正9點半，「明明綠燈轉眼變成紅燈」又起樂，指數朝往牛證方向殺下去，截至依家為止，恒指最低做過28620點，第一層牛證街貨28700至28799點全數死亡，呢度有相當於482張期指，而最貼價變相為28600至28699點都有成453張期指，不過都估到裡面嘅街貨死得嘅死，散得嘅散，同傳媒行業一樣。

先睇恒指小時圖，今朝喺聊天室度都有講到小時圖上條10小時線(小時圖 x 10線)由上星期三(6月2日)10點至今都成為阻力，本以為今日恒指高開可以破到呢個位，但可惜支「大陰燭」大到無輪，至依家10點10分先見叫做跌勢稍為喘定，小時圖見有150x小時線(小時圖 x 150線)暫成支持。

再睇返恒指五分鐘圖，見指數喺10點17分終於上返條50分鐘線(五分鐘圖 x 10線)；再八掛埋10分鐘線都開始見轉勢，作狀出咗個「早晨之星」嘅物體，仲要第二粒燭係接近「十字星」形態。

「有『早晨之星』咁咪可以出動好倉囉？」理論上係，不過大前題終於恒指現價近下方牛證街貨，而且牛證街貨數量都唔少，又真係諗到唔有咩理由唔向下殺，今日又唔係初一、十五。DT方法：恒指熊(68263)，收回價29350點，同現價有逾680點差距，見恒指五分鐘圖唔過100分鐘線就出動，再安全啲可以搭埋條SlowSTC(14,3)高位回落先出動(都未必，一陣市弱/要殺生起上嚟，隨時上到中軸位%K線向下穿%D線都未定)，仍然小注為上。

今日Lunch約咗班戰友開飯，今次係我第二次同呢班戰友裡面其中三個人開飯局(限聚令嘛，你估我哋成班人唔想搵個大啲嘅地方載歌載舞咩)，【輪證下半Part】可能晏少少，實有嘅，放心。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

Patreon：https://www.patreon.com/cbbcwar
秒投輪證教室：https://bit.ly/31HG6AN