港股直擊 | 2021-06-04 10:53
實在太過癮!見住恒指五分鐘圖三次不破50分鐘線(五分鐘圖 x 10線),再加埋小時圖上失埋保歷加通道中軸,聊天室朝早開嘅淡倉一揸揸到尾咁滯,悶聲真係可以發財。
至於隻嗶哩嗶哩(09626),去到上半場完仲以為自己「捉蟲」之際,下半場見股價隨恒指炒落,本身喺噚日嘅【輪證下半Part】set好等小時圖SlowSTC(14,3)都轉埋勢之後先至將隻嗶哩Put(23172)放走,結果去到收市都未見到小時圖SlowSTC(14,3)確認轉勢,唯有膽粗粗揸過夜。
今朝開市前本以為恒指都會彈一彈先至再落,五分鐘圖見指數SlowSTC(14,3)已經到地嘛,誰不知一開再跌,再睇返隻嗶哩,噢!今日日線圖個裂口比噚日仲要大,不過喺依家9點55分,見到小時圖SlowSTC(14,3)已經確認咗低位回升中,按策略(23172)可以放走,就按今朝開市至依家(23172)高低位做過$0.219/$0.217,平均沽貨價為$0.218,對比噚日平均買入價$0.187,過夜食31格或16.6%。冷門Put都害我唔死,唔通我嘅黑氣已過?
依家10點3分,睇返恒指跌幅收窄咗好多,其實噚日收市後都有同聊天室戰友睇埋完場後走勢,不論係五分鐘圖還是小時圖都見到SlowSTC(14,3)落到超賣水平,所以都預咗出技術反彈,只係無預計指數今朝低開咁解;或者都可能係好事,挫低啲嚟低位出好倉,買牛/Call個價又可以平啲。只不過係依家見恒指五分鐘圖上50分鐘線已破,但見100分鐘線(五分鐘圖 x 20線)由噚日到依家都未破過,所以安全起計,可以睇埋恒指有無力上破100分鐘線先再出手好倉。
畢竟恒指現時係近牛證街貨,同埋小時圖上即使低位出現「錘頭」兼SlowSTC(14,3)確認回升,但佢頭頂條10小時線(小時圖 x 10線)同50小時線(小時圖 x 50線)相交咗,小時圖出現「死亡交叉」,怕且恒指彈都未必彈得好高。
恒指熊(68303),收回價29400點,同現價有逾500點差距, 同一收回水平中槓桿最高,策略上留意恒指五分鐘圖破唔破至條100分鐘線啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
秒投輪證教室:https://bit.ly/31HG6AN