港股直擊 | 2021-04-09 10:59

【輪證贏家】今日被恒指fake到兩次

噚日喺【輪證下半Part】度講咗喺咩情況之下可以預計得到「超買再超買」嘅出現，今日朝早竟然再發生多一次，不過今次就係「超賣再超賣」。

同樣地今朝見到恒指高開低走後，有喺聊天室著大家可以準備出恒指牛，仲揀咗隻極高槓桿做Day trade，但都講到明一日唔見五分鐘圖嘅SlowSTC(14,3)轉勢，一日都唔好出住；進一步再留意如果見到保歷加通道口拓闊的話，就算條SlowSTC(14,3)幾咁超賣都好，都係唔好出手，因為呢啲位就係預視比你知SlowSTC(14,3)可以「超賣再超賣」，分分鐘要棄反手出好倉嘅念頭，用淡倉追殺落去。

的確，今朝我都被個市fake咗一嘢，喺今朝9點55分到，返到公司開晒機準備去斟杯水之前，見到恒指五分鐘圖SlowSTC(14,3)兩線落到個位數以下嘅嚴重超賣水平，而保歷加通道都明顯係拓闊中，換言之出「超賣再超賣」嘅機會好高，不過，就係喺呢個moment見到陰陽燭圖上低位出咗「T星」，明白到係要等SlowSTC(14,3)數值上確認轉勢先至好出手，於是就去斟水，之後再睇下發生咩事，結果，伴隨「T星」嘅係一粒企咗上500分鐘線(五分鐘圖 X 100線)嘅陽燭，但話口未完就再嚟多次陰燭向下殺落去，day trade通常就係死喺呢啲位，我都唔會例外，唯有寫多張memo紙貼喺電腦前提醒自已唔好再犯同樣嘅錯(衰少次都當贏架啦！)

依家10點17分，恒指keep住跌180至200點呢個範圍，喺五分鐘圖上見恒指SlowSTC(14,3)已經行緊「超賣再超賣」，而就係由被fake嗰下開，指數重返保歷加通道裡面，恒指依家幾近橫行，怕且都係等條50分鐘線(五分鐘圖 X 10線)落嚟，比返少少面子佢向上彈一下。

再睇埋恒指日線圖，今日數上雖然係見下行，不過由於開市價(截至依家10點20分嘅高位)29152點，位置上比噚日進一步貼近50天線(29240點)，而同見SlowSTC(14,3)由3月25日嘅超賣水平回升至依家接近中軸位置，%K線作勢跌穿%D線，會否喺日線圖上依家就係行緊一個「小圓頂」嘅最頂部位置呢？

返轉頭睇返個五分鐘圖，依家10點27分，恒指跌幅略為收窄，至跌154點，做28853點，五分鐘圖上的確上返50分鐘線喎，不過，以日線圖行出嚟嘅方向，似乎大方向下行嘅機會率比較高，唔好貪心咁講話佢會出「小圓頂」，似乎50天線都會做到阻力。

恒指熊(50490)，收回價29368點，同現價有逾500點差距，成交活躍，逾34倍槓桿適合day trade。

10點32分，想補多句就係再次恒指fake，明明上到50分鐘線，但轉個頭再次下行，兼且變成受制於500分鐘線，唯有重新再畫過一個圖，追淡倉都係呢啲時候。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

MeWe/Patreon/FB/IG：輪證贏家
秒投聊天室：輪證教室