港股直擊 | 2021-04-07 11:25

【輪證贏家】五分鐘圖&小時圖swing trade方法

一連放咗五日假期係咪好爽先？我就向來有無假放都係咁上下，因為每日都有少少、少少公司嘢要處理；今日返到嚟仲大獲，開市無耐就收到親愛嘅PM嘅message：DB service is offlined，仲要唔係半日內可以處理到嘅事，唉，對我嚟講，塵世界最痛苦嘅事莫過於開市先嚟死機。

今朝喺巴士返公司途中，恒指已經完成U盤，開市升逾160點，報29101點，恒指熊證街貨首兩層已經死亡，呢兩層夾埋有相當於1276張期指，而29100至29199點變成最貼價熊證街貨，呢層有相當於581張期指，以恒指開市以1點嘅姿態殺首兩層；再加上依家高開低走嘅姿態，估計呢一層嘅街貨，聽日返嚟見隨時多過依家。不過，見恒指五分鐘圖今朝SlowSTC(14,3)兩線上到嚴重超買水平，所以早早就喺聊天室度同大家講定可以入恒指熊，以五分鐘圖最近嘅平均線(通常都係50分鐘線(五分鐘圖 X 10線)，因為時間最短嘛)為目標，一到就留意恒指有無力再落，如果有，就再向下數多一條平均線(又通常都係100分鐘線(五分鐘圖 X 20線)，因為時間係第二短嘛))，如果連呢條線都無埋嘅話，咁就可以順理成章地去用保歷加通道底部作為目標。

依家10點27分，似乎聊天室內今日首注恒指熊問題不大，再貪心嘅就只係保歷加通道口拓唔拓闊，比位恒指再向下走。

其實，同樣嘅都適用於唔同時間嘅走勢圖之上，如今日朝早都見到小時圖SlowSTC(14,3)兩線上到嚴重超買水平，依家再睇返小時圖出第二支陰陽燭，已經見到有高位回落嘅走勢，以小時圖嘅天線排位計，目前最接近指數嘅係100小時線(小時圖 X 100線)，位置大約係28731點，當然，小時圖走勢比五分鐘圖慢得多，隨時一日內用五分鐘圖可以做到三至四轉swing trade，但小時圖就隨時用兩至三日先做到一次swing trade，關鍵在於你每日有幾多時間去睇住個市啦。

恒指熊(51747)，收回價29400點，同現價有逾500點差距，35倍槓桿適合day trade，成交活躍；喺10點39分時返番去睇五分鐘圖見保歷加通道底見有拓闊嘅跡象，呢個位出熊係極度進取嘅，安全的話就反過來試等恒指撞唔拄得返上50分鐘線後無力先至出熊；再安全嘅就等SlowSTC(14,3)重返超買水平先啦。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

MeWe/Patreon/FB/IG：輪證贏家
秒投聊天室：輪證教室