即巿股評 | 2021-03-30 14:13

【盤房來料】連登契媽開新ETF 科技股齊齊贈興

美國家族投資公司Archegos資本管理未能補交孖展而遭斬倉，拖累多隻中概股上周遭大洗太平地，而野村跟瑞信更因此錄得巨額虧損，雖然令市場有所憂慮，但暫時未見有其他投行瀨嘢，亦未見有其他基金再爆煲，望就望事件唔會繼續發酵，演變為雷曼兄弟事件2.0。美股隔晚個別發展，道指再創收市新高升98點，標指跟納指則分別跌3點及79點。港股連升三日，嚟到3月期指結算日上返條10日線(約28597)，隔晚美股嘅中概股止跌，帶動港股呢邊嘅科技指數返彈逾3%。

恒指早段高開214點，A股走強，帶動港股升幅擴大至最多341點，成功收復10日線，半日高位見28679點。恒指報收28672點，升334點；國指報收11063，升120點；恒科指中午升252點，報收8233點。半日成交額922.92億元，長假期預咗市場會較為審慎，雖然半日升市成交低過1000億元，仍可以接受。

雖然美國10年債息重上1.7厘 以上，但一如阿Man呢幾日咁講，科技股經過一輪殺估值，而市場亦已開始接受債息趨升嘅預期，科技股已無再插水。加上由連登契媽主理，針對太空開發創新技術ARKX，計劃今晚上市，咁都要贈一贈興，科技股普遍做好。契媽呢個「太空倉」持股包括JATMX之中嘅美團(03690)、騰訊(00700)、阿里(09988)同京東(09618)，雖然諗到頭都大埋，唔知呢四大天王同太空開發創新技術有乜關係，但有理無理，有契媽射住係唔同啲，半日美團彈5%最勁，京東跟阿里半日升3%，騰訊只有1%進賬，似乎契媽威力遠遠不及北水大媽……

藍籌股方面，銀行股做好，利率趨升有助拉闊銀行息差收入，大笨象(00005)、中銀香港(02388)走高0.2%；工行(01398)漲0.2%。話咗內房股高追無着數，兼且呢期派完成績表好多股份都見光死，潤地(01109)跟中海外(00688)派完成績表均逆市下跌，前者跌3.7%，後者跌4.6%，表現最差兩藍籌。

早兩日阿Man曾經喺聊天室表示，係時候要配置返啲醫藥股喺投資組合內，首選龍頭藥明生物(02269)，上半場一度重上紅底，半日升3.8%，呢隻值得中長線持有。海吉亞醫療(06078)去年經調整利後勁賺八成，半日大升一成，康龍化成(03759)跟君實生物(01877)半日亦錄得同樣升幅。

阿爺開到口話要注意新能源汽車炒風，更點名批評恒大汽車(00708)，半日再跌2.4%，跌幅較預期少，其他汽車股普遍下跌。小米(01810)近日屢傳有意加入電動車市場，但集團每次否認傳聞踢爆狼來了，指一直未為有關業務發展立項，小米唔知係早能預測阿爺心意，抑或雷軍行緊運。

麥狄文

(徐狄怡‧證監會持牌人)