即巿股評 | 2021-03-30 07:00

【佛系股評】後市三大看法幫你發達

近日，市場小姐間中呢喃某某投行話科技股已經跌完，投資者即將重回懷抱。但看得出，她對科技大媽已從失望變成無望，嘴上不認輸，但近日對佛系男語氣愈來愈好，又詐假意打聽佛系男買咩股票。

記得佛系男在二月中提到的敘福樓(01978)嗎，悶聲發財，股價昨日曾報0.8元，52周新高，個半月賺近七成。

至於市況，佛系男自有看法，或者可幫到大家提早發達。

1） 連輸十幾年的紅籌股將迎來二次翻身。理由有三：首先，老股民應該記得廿年前香港回歸，紅籌曾經風靡一時，今日香港實行回歸後再深化，紅籌再次跑出又有咩出奇？第二，紅籌跑輸十幾年，估值低到無可再低，大折讓處處皆是，疫後大市尋找價值股，紅籌自然水到渠成。第三，繼前年國資委下令央企要做好股東回報後，上星期破天荒再度下令央企上市公司要做好投關及市值管理，當然就係睇唔過眼國有資產被貶低，國家顏面何存？而且，美元信心缺口已開，要人民幣活起來，當然要提升國有資產在國際市場的吸引力。至於買邊隻央企？請繼續追看【佛系股評】。

2） 環球股市面臨颶風級別風險已經浮面。通脹及美債上升是一回事，但過去兩星期卻發了令佛系男更擔心的兩件大事。其一是土耳其股市急跌停市，其二是阿根廷資不抵債。過去幾次超大型環球冧市前，都曾經出現類似這種無人關注的黑天鵝事件。但以目前水浸情況，大家可即管繼續享受聽音樂爭凳仔。

3） 疫後升市開鑼、環球基建開旺。近幾日，本地都陸續零確診，連歐洲都放聲希望暑假放寬旅遊，似乎現在是賤價買疫後股的最後機會。另外，佛系男已經重覆多次新科技興起要靠基建，而全世界都出現一個「高科技、低建設」情況。要避免股市泡沫爆破，谷基建填滿泡泡就是最直接做法。既然空中樓閣已經成型，趕快起幾條梯、幾根柱頂住，就唔會跌散啦！

梁樹德
筆者先後修習哲學、心理學、經濟學、企業管治和工商管理等碩士課程，在證券分析、企業戰略計劃、投資者關係工作及財富管理等方面有豐富經驗。在亂世末法的此岸，奉經論典籍為圭臬，心若浮沉，淺笑安然。筆者是證監會持牌人。
(編按:《佛系股評》將會逢周二市前上載於信報網站)