國際財經 | 2021-03-24 17:19

【環宇搜股】捱多五日盼轉運

過去一個月美國10年債息狂飆，周一批死物極必反可撐起股市，結果債息一面冧棚，股市(特別喺港股)卻一面隊，簡直喺吹脹！

諗番轉頭，債息回落，意味移除市場最大風險因素，但被美元玩死。美滙午後升至四個月高位，美滙升，則不利新興市場，新興市場邊個最大，咪就喺中國股市。

歐元冧踢高美滙

美滙升，市場賴土耳其總統埃爾多安，突然撤換央行總裁，拖累當地股市及貨幣急跌，加埋法國部分地區實施封城，德國也決定將封鎖措施延長，令市場擔心疫情仍嚴峻，故掃入美元避險。

表面邏輯似層層，但筆者唔同認同，首先土耳其GDP(2019年)喺全地球第19位，僅佔全球GDP的0.87%，此國貨幣及股市大幅波動，對比全球影響微乎其微，更何況土耳其由2019年中第3次換央行總裁，大家都見慣。

德法兩國疫情無可否認嚴重咗，但睇番當地兩個股市，其實依然企在高位。至於美元抽高，原因喺對手歐羅太弱推高美元，而歐羅咁潺，就因為3月18日歐洲央行行長拉加德(Christine Lagarde)表明，歐洲買債步伐加快會更明顯，當日歐羅應聲下跌，而歐羅佔美滙指數佔比達五成八，即喺立即踢高美元(圖一)。

由於歐羅弱推高美元，簡接拖低新興市場，加上中國疫情受控，人行又唔大力放水，最終質低中港股市。

捱埋平衡基金執倉

另一個令股市呆滯原因(特別是美股)，是平衡型基金(Balanced mutual fund)季度結前調倉所致，尤其第一季債息大幅攀升，意味債價下跌唔少，假設一隻平衡型基金七成買股，三成買債，但到季尾，由於債價急跌，此基金債類資產一定少過三成，為保持七/三比，故年結前要沽股買債，也是令股市表現較弱的主因。

至於後市，雖然受到美元走強影響，但後市仍樂觀，尤其等待三月底待平衡型基金調整過後，連同債息回落，相信股市會迎來一個唔錯的升幅。

不過，短期隨著歐元有可能進一步走弱，即喺美滙進一步走強，策略上要減少買入亞洲及中國股票，同時美元強也不利資源股，故此港股假倉減持資源股，更增加現金至45%(圖二)。

美股倉方面，也由於美滙走強，未來會進一步減持資源股，同時隨著美債息率回落，未來將換入更多科技股(圖三)。

作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周一、三在「信報網站」及「港股360」撰文。

（編者按：信報分析團隊羅崇博、尹德政、陳鎮強最新著作《勢在必行：活用全方位價值趨勢信號》現已發售）

歡迎訂購實體書　電子書：https://bit.ly/ejbook141