港股直擊 | 2021-02-22 10:44

【輪證贏家】恒指牛追返上去熊證區

今日都終於正式返工，公司終於都坐滿人，只係聊天室啲時間又唔同咗。今朝早恒指數高開426點，重上31000點，不過，見到恒指五分鐘圖上到嚴重超買水平，估計恒指有機會高開後低走，於是叫定聊天室戰友準備定隻恒指熊，直至五分鐘圖見恒指落返50分鐘線(5分鐘圖 X 10線)為止。

依家9點55分，返到公司斟埋杯水坐低，就見到五分鐘圖踩住50分鐘線啦，快搶第一轉都總算成功。

再睇恒指牛熊證街貨圖，見今朝恒指高開後先殺首三層熊證，最貼價層上移到31000至31099點，不過呢度唔係好多街貨，如是要計貼價又多貨的話，都要數31200至31299點呢度，有相當於577張期指，恒指會唔會喺稍後時間屈返上去再殺埋呢500幾張期指？若然五分鐘圖上條50分鐘線有支持的話，再配埋小時圖上條20小時線(1小時圖 X 20線)有支持，恒指牛(63080)，收回價30050點，同現價有逾800點差距，進取者如稍後時間仍見到恒指五分鐘圖踩住50分鐘線或小時圖踩住20小時線的話，可以小注試入。

另外，農曆新年過後就係業績嘅高峰，Patreon已經新增咗「業績期大作戰」嘅欄目，每周提供當周炒股路線，公布前一日亦有重點業績預測、股價技術分析同埋績前部署，有意可多加留意。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

MeWe/Patreon/FB/IG：輪證贏家
秒投聊天室：輪證教室