即巿股評 | 2021-02-03 13:21

【盤房來料】阿里守得雲開仍要靠北水方可爆升

美股隔晚繼續反彈，三大指數升逾1%，但美國連登仔玩緊嘅幾隻YOLO股散水，幸而相關股份規模唔算大，而沽空比例亦已大幅下降，對大市整體影響有限。由於監管機構介入，估計呢股風氣未必會蔓延落去，如果有缸邊友高追咗GME，AMC呢啲股，奉勸一句止蝕要狠，要畀掃貨勇敢，唔好再同呢啲股份糾纏落去。至於港股連彈兩日，反彈近千點後，今日高開低走，目前喺二萬九水平爭持。

恒指高開56點，報29305點已經見咗半日高位，開市即掉頭向下，一度跌281點，曾閃失兩萬九，見28967點半日低位。恒指中午收報29110點，跌137點；國企指數報11612點，升3點；恒科指半日升146點，報收10122點。
阿里(09988)噚日收市後派成績表，表現合符預期，阿里雲業務進度理想，可惜就係無乜驚喜，加上公司有意發行優無抵押債券，拖累股價半日最多跌近半成，中午跌3.9%。不過阿Man係阿里長線擁躉，其股價一直落後TMX，主要係因為第二上市未有北水入場撐腰，加上之前馬雲衰多口，好彩聽阿爺最近口風，都已原諒咗佢，張勇亦講明會配合監管機構，總之一句跟著黨走，阿Man有信心只要今年內第二上市公司可納入港股通後，阿里巴巴將急起直追，龜兔賽跑未到終點都未知邊個係贏家。

其他重磅藍籌股個別發展，話咗藥明系股份係愈批愈升，藥明生物(02269)擬折讓7%配股，半日反而逆市升2.2%。友邦(01299)半日跌1.8%，呢隻係少數阿Man認為可以配置嘅傳統股，早前爆升至紅底樓上回調，依家落返50日線左右，可以開始收集。至於科網巨頭美團(03690)再創新高，見414.4元，但半日升幅收窄，中午報收410元。騰訊(00700)半日升1%，小米(01810)繼續整固，喺30元水平呆滯咗一段時間。

其他次一線嘅科技股亦被熱捧，早兩日阿Man再推介嘅金山軟件(03888)再創新高，半日升7.2%，有報告調高其目標價至75元，睇嚟都好快到埗。聯想(00922)亦係阿Man最近推介嘅心水股，中午公布業績理想，上半場已有春江鴨偷步，半日升近7%，睇嚟下晝有機會再放一段。聯想公布回A計劃後，股價至今不過升兩成幾，預測PE仲係未夠20倍，呢啲估值回A實在失禮，回得A股上市，至少PE都要上到30+先有睇頭，雖然今日可能好消息出貨，見完高位有機回返啲，但只要企穩十皮呢個位，整固一下又可以組織下一輪升浪。

內需股中嘅餐飲股繼續尋頂，市場憧憬春節期間會有理想銷售額，九毛九(09922)、呷哺呷哺(00520)和海底撈(06862)再創新高，半日分別升8.1%、6.5%和1.4%。內需股自去年中開始起步，阿Man亦曾推介板塊內嘅領袖股，今年喺國家政策繼續力谷內需下，呢個板塊表現唔會差得去邊。

麥狄文

(徐狄怡‧證監會持牌人)