港股直擊 | 2021-01-08 11:11

【輪證贏家】慢煮恒指牛配小時圖

話說噚日好神勇咁偷位Put咗隻小米(01810)一下啫，我位重貨同事Designer Ken即刻Whatsapp我，做咩啫，偷偷地咬咗隻小米一啖啫，今日咪又係無事無幹(依家10點9分見小米暫出一粒少少嘅陽燭，左手邊有噚日嗰粒大大嘅陰燭，萬一佢上唔返10天線($33.17)，呢個「身懷六甲」失效就真係20天線($31.192)見啦，小心條SlowSTC(14,3)唔煞掣呀！小氣鬼！)

依家10點16分，開咗市都有45分鐘，恒指用咗半個鐘搵方向之後，終於都係森林裡面走返出嚟，此前(大約10點到)已經喺聊天室同戰友們講定今日熊證成交較少，怕且啲錢都係向上炒殺肥熊，同時用小時圖講解今日慢活玩法(唔係下下都得10分鐘入市然後不消半個鐘又得10分鐘沽貨咁趕頭趕命嘅)，恒指牛好彩都見到有戰友跟到。

「真係可以用小時圖追升？」故事要由噚日開始講起。話說噚日(定前日)都仲係有啲雄心壯志想開淡倉，但礙於熊證街貨實在太重嘅關係，所以都對開淡倉有少少顧忌(如果唔係都唔會只偷咬小米Put)。噚日朝早已經喺聊天室度叫大開不如開隻長熊/長Put，但結果喺下晝喺恒指10分鐘圖上發現咗粒「錘頭」，於是就拿拿臨叫大家放低手上所有淡倉，反手出好倉(可惜無過夜)；同步都見小時圖喺20天線有支持。

廷至今日，小時圖嘅20天線終於成為彈床，將恒指推返上去，同步見SlowSTC(14,3)喺今朝開市嘅中軸水平向上走，14RSI都跟架。

用小時圖出好倉絕對係炒輪證中慢活嘅表現，恒指牛(65434)，收回價27147點，同現價有逾500點距離，就算慢活，都要識得見好即收，走勢嘅嘢隨時話變就變，所以安全計可以等恒指五分鐘圖條SlowSTC(14,3)回返去超賣水平時，再望望小時圖條20天線仲守唔守得住先再入市，希望喺一個咁凍冰冰嘅Happy Friday都有塊牛扒收割嚟食下。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

FB/IG/Patreon：輪證贏家
秒投聊天室：輪證教室