即巿股評 | 2020-12-18 13:32

【盤房來料】內地電訊股短線炒高當睇佢唔倒

美國首領失業人數超過預期，創自9月初以嚟最高，受疫情反覆反彈影響，美國就業市場復甦受阻，但市場相信聯儲局喺一段時間內會為市場提供重大支持，美股樂觀情緒依然。美股隔晚向上，三大指數齊創新高，但傳聞中9000億美元刺激方案，足以使小企業及受疫情打擊嚴重的行業渡過難關，尤其考慮到疫情最快可能喺明年第二季結束，支持美股繼續做好。不過港股就跟唔上，連升兩日後今日腳軟，再度失守20日線(26546點)。

恒指低開27點報26650點，早段跌幅曾收窄至10點，高見26668點，但沽壓再度增加，跌穿20 日線後跌勢加劇，最多曾跌230點，低見26448點，幸而10日線暫見支持，恒指跌幅收窄至200點內。最終恒指報收26499點，跌178點；國指半日跌51點，報收10494點；恒科指跌56點，報收8276點。

藍籌股大致受壓，友邦(01299)跟大笨象(00005)分別跌1.4%及1.5%，建行(00939)亦跌1%，港交所(00388)一直係少數阿Man睇好嘅傳統股，半日僅跌0.05%，一直喺高位徘徊，可見持貨者都惜貨如金。石藥(01093)反彈幾日今日又回軟，半日跌2.3%，係表現最差藍籌；安踏(02020)緊隨其後，半日跌2.1%。

話咗呢期科技月股表現反覆，JATM連跌兩日後再度回落，今日連唔受反壟斷法影響嘅X小米(01810)亦要下跌。不過京東(09618)旗下嘅京東健康(06618)再創新高，半日升6.1%，帶動阿里健康(00241)半日升1.3%。

噚日阿Man講過信義光能(00968)有強勁業績支持，批股唔死得就有後着，升勢可維持，果然今日再創新高，半日升5.6%。今日幾間大行齊齊調高信義光能目標價，大摩目標價18.8元，主要係相信明年光伏玻璃供應仍然緊張。除咗信義光能之外，另一龍頭福萊特玻璃(06865)亦有大行睇好，兩間龍頭企業，合共佔市場份額達50%，可持續受惠於規模經濟，高產品無缺陷率及更先進嘅技術。其他新能源股繼續有資金追捧，不過阿Man基於買股先買龍頭嘅原則，其他次一線嘅新能源股都係睇下食花生算。

內地三大電訊商傳部署5G消息規模化，中移動(00941)及聯通(00762)分別4.2%和4.1%，中電信(00728)升5.6%；連蟹貨重重，有名中國鐵頂嘅中國鐵塔(00788)亦升0.8%；中興(00763)則升1.5%。不過呢個板塊阿Man一向唔睇好，短線升嗰一日半日，當時運高睇佢唔到。

麥狄文

(徐狄怡‧證監會持牌人)