港股直擊 | 2020-12-03 11:13

【輪證贏家】美團牛已開餐

Work for home咗幾日，終於都忍唔住係都要返公司一趟；喺屋企望出街見到有太陽，不過老爺都係溫馨提示一句：著返件褸好啲。結果一落樓啲風大到呢...好彩人愈大新陳代謝愈慢，有返咁上下磅數嚟講都仲企得穩(真係好鬼凍)。

今朝恒指開市報26623點，升90點；噚日揀咗隻美團(03690)嘅牛證(57271)，等咗一個下晝終於都見到喺大約2點30分至2點40分，同埋2點55分至3點5分，SlowSTC(14,3)落到超賣水平，不過呢個超賣位都唔算好低，或者係噚日恒指向上走比咗少少動力出嚟，不過要入嘅話都真係要吼呢兩個位，按呢兩個位(57271)期間分別做過嘅證價，第一次為$0.081，第二次高低位為$0.08/$0.078計，平均價$0.079，以今朝美團高開後，首15分鐘見5分鐘圖SlowSTC(14,3)迫返上超買時走佬嘅話，(57271)高低位做過$0.095/$0.089，平均價為$0.092，即平均賺幅介乎13.6%至16.5%。

「明明話入美團牛係等星期五基金追貨，下個星期一正式染藍架，咁快收工嘅？」古語有云：有食唔食，罪大惡極。

至於痕咗幾日嘅蒙牛乳業(02319)，今日見股價逆市下挫(暫時啫，事關恒指依家升幅都收窄咗啦)，日線圖見蒙牛今日終於都落到保歷加通道底部，只係SlowSTC(14,3)仍然喺16呢個超賣位未見有起色(即橫行中)，反正都落到嚟就繼續觀察住先啦。

返到公司最正就係可以開住部電視機睇財經台，見住佢右下角係咁LOOP住啲焦點股，見到好耐無出現嘅領展(00823)，哦，原來有大行唱好，怪不得今日再彈；再LOOP見到隻滙控(00005)，睇睇日線圖上條「上升通道」升得唔錯，但仲有無得去？八掛埋個周線圖都上到50天線以上，但條SlowSTC(14,3)同步都見80幾、90幾呢啲範圍，係就係想開佢淡倉，不過都係等轉勢先啦，反正今朝美團都開咗餐，就落街買份早餐先啦！

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

FB/IG/Patreon/秒投聊天室：輪證贏家