即巿股評 | 2020-12-01 13:59

【盤房來料】中海油未止跌勿多手接飛刀

雖然美股隔晚回軟，但總結11月份美股表現相當威猛，道指累升11.84%，創自1987年1月以嚟，表現最好嘅一個月，主要得益於美國總統大選結束，不明朗因素逐漸消除，以及疫苗研發取得重大突破。標指、納指喺11月分別累升10.75%和11.79%，均創4月以嚟最好表現。雖然美國有大好友對美股後市充滿信心，認為標指喺年底前可以升至4000點，較現價仍有一成升幅，但市場風險仍然存在，包括地緣政治事件，以及華府可能出現嘅政策失誤，不能掉以輕心。
噚日港股喺11月最後一個交易日表現麻麻，恒指跌咗五舊幾，10日線失守，不過今日喺疫苗消息利好下，再加上財新11月中國製造業採購經理指數(PMI)升至54.9，創下2010年11月以來的最高水平，港股噚日跌咗五舊幾後，今早反彈近1%。恒指高開81點，開市後僅升33點，低見26375，之後發力收復10日線(約26573)，半日最多升287點報26628。恒指中午報26586點，升244點；國企指數報10671點，升125點；恒科指跑輸，半日跌12點，報8007點。
兩隻重磅藍籌股友邦(01299)跟騰訊(00700)已佔去恒指過半升幅，半日分別升3.1%及2.7%，全力推高恒指152點。中資金融股繼續有資金追捧，工行(01398)跟平保(02318)分別升3.9%及3%，反而本地銀行股有回吐壓力，大笨象(00005)及恒生(00011)半日齊跌0.7%。至於已經喺制裁名單上嘅中移動(00941)低處未算低，今日又跌0.3%；而有可能被拖埋落水，加入制裁名單嘅中海油(00883)噚日急挫逾一成後仍未止跌，半日跌穿8元，再跌超過3%。寧買當頭起，莫買當頭跌，呢個時候咪以為有平貨執而接飛刀。

中生製藥(01177)今年首三季少賺18%，被多間大行調低評級及目標價大幅下調，半日急跌逾一成。唔少人之前買咗中生收埋紅股變相拆細，但股價失守10元早該止蝕離場，死守無意思，嚴守止蝕係入場炒股第一戒條，連最緊要一項戒條都未能遵守，真係唔好入場買股票。唔少人經想妄想終有一日可以坐到重返家鄉，即使最終返到家鄉，但當中過程要花幾多時間，損失幾多機會成本，相對壯士斷劈肯定代價更大。

下周一起恒指服務公司季度檢度後變更開始，即係追蹤相關指數基金需要喺本周五就變更對組合進行調整，即係我哋一般講嘅rebalancing，而將會被納入恒指成份股嘅安踏(02020)半日升近5%，而其他體品股亦有追捧，整個板塊做好。之前阿Man已推介過買入安踏，有跟住買現已立於不敗之地，唔排除安踏喺呢幾日再破頂，穿頂唔估頂原則下，可以10日線108.45元作為止賺參考。

 麥狄文

(徐狄怡‧證監會持牌人)