港股直擊 | 2020-12-01 13:45

【輪證贏家】恒指暫未見方向

放咗一日假，不過今日都仍然要喺屋企，話說weekend收到公司通知，同層嘅一位同事嘅屋企人中咗肺炎，唔單止會將全層樓做深層清潔同消毒，所有同事都強烈建議Work from home，直至同事有報告為止。我知道係邊條team，但就同佢哋從來都無交過手，不過大家同處一層，我都希望你無事啦！(我深愛嘅Hello Kitty計數機仲喺公司架！你咁樣我要冒死返去救佢架！)

噚日恒指無啦啦跌咗成500幾點，留意返個成交額係去到2400億，大多數人都話「27000點阻力都唔係講玩笑」但我就覺得係「林鄭無啦啦出嚟講話先至唔係省油燈！」

至於放假前放底嘅美團(03690)，純綷都係睇好佢噚日派績或有驚喜，所以揀定隻美團牛(58029)。拆返開條5分鐘圖，見噚日開市美團一大支陰燭向下插，股價落到$300邊皮橫行一段時間後，臨收市仲要向下插多下，嘿，真係多得你唔少，噚日咁嘅勢有乜可能同你顛落去？再加埋有林鄭加持，止蝕當做善事算數。

依家9點34分，啱啱正式開市無耐，見恒指5分鐘圖開市後彈跳至保歷加中軸後就停咗喺度，我知，今日星期二，林鄭又會出嚟見人(例牌行會)，但呢個向來對大市影響不大；係啦喎，咁逢星期二叫開Put日，我慳返兩隻稿啦。

睇返恒指日線圖，噚日一支「大陰燭」向下走，失守10天線不得止，仲將點數拉返去接近20天線水平，SlowSTC(14,3)一早向下；只係最難明嘅係，熊證街貨層由本來得一層有過千張期指，儲到噚日見有三層過千張期指，到今日再見雖然少咗啲，但9xx至1xxx都唔惹少，咩事個市到依家都仲未肯開餐？仲要等邊個？

恒指搞唔掂，唯有向個股埋手，ATNX基本上都同恒指方向相若，所以都係暫時無從入手，唯有向冷門嘢出發。

搵搵下醒起早幾日唔知邊個同我講內需翻生，可能係返工時睇緊電視講，亦有可能喺我隔離左右班口痕友講，於是就向內需股埋手，又被我撞到你喎，蒙生，不過日線圖我仲嫌啲啲嘢，就比一個朝早嘅時間大家相處下先。

下晝續。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

FB/IG/Patreon/秒投聊天室：輪證贏家