即巿股評 | 2020-11-25 14:00

【盤房來料】第二上市公司未獲納入港股通捱沽

隔晚美股做好，三大指數上升，道指升穿三萬大關，跟標指雙雙創收市新高，帶動港股今早做好。恒指高開231點，開市後反覆向上，半日最多升452點，見27040點，創2月24日以來新高。不過施政報告宣讀期間，大市開市回順，升幅曾收窄至213點，見26801點半日低位。次次特首出嚟講嘢，大市定必回調，無論當日係升市或跌市都好，總之佢開聲講嘢，指數就回落，難怪口痕友尊稱特首為人肉熊證。恒指中午收報26814點，升226點；國企指數報10650點，升37點；恒生科技指數跑輸，半日跌1.5%，報7985。

藍籌股個別發展，疫苗最快下月推出市場，市場憧憬經濟加快復甦及回復疫情前正常狀況，百業之母銀行股回升，大笨象(00005)今日大翻身，半日升6.8%，罕見地成為最大升幅成份股。大笨象股價重越42元，成功重上250日線，若然能企得穩42.5元，仍有機會向挑戰45元，並回補宣布暫停派息當日嘅裂口。

由於早有放風擴闊港股通範圍，港交所(00388)今早一度創398.4元新高，不過施政報告表示暫時只納入未有盈利嘅生物技股股，即係我哋叫開嘅B仔股，而第二上市公司即幾隻巨無霸阿里(09988)、京東(09618)及網易(09999)暫時未獲納入港股通，只係會考慮，所以相關本來受惠嘅股份，全部食咗瀉藥咁倒跌。小米(01810)又係派完成績表後見光死，但短炒已達目標28元，之前阿Man多次叫喺20至22元收集，再喺22至24元買入短炒博業績，已經完全達標，短炒已經食到飽。至於長線投資，不妨等兩日觀察一下，落到10日線約25.2元如果守得穩，可以考慮吸納作長線投資。

疫苗又有好消息，資金又再流入傳統股，石油股及相關油服股落鑊。外圍期油創八個月高位，收市抽高逾4%。三桶油分別升3.1%至4.8%；中海油服(02883)飆6.1%；宏華(00196)升4.9%；海隆(01623)升4.8%；安東油田服務(03337)飆11.5%；中石化油服(01033)升12.7%。不過無論呢個板塊點樣炒都好，短線波動係唔好令阿Man提起興趣，因為環保大趨勢下，石油及相關產品嘅使用唔會隨經濟復甦而大幅增加，極其量係回復正常。

醫療設備股又捱沽，繼首批冠脈支架國家層面集中採購後，山東七市聯盟開展骨科領域集中採購，骨科相關單品降幅最高超過90%。受相關政策影響，醫療器械重挫，咪見呢批股份跌得急去接飛刀，暫時呢個板塊避之則吉。
政府將撤銷向非住宅物業徵收雙倍印花稅，地產股今早造好。都係嗰句，地產股面對租金壓力，一個半個短炒消息挾高股價，又係唔好手多高追，面對成條街十至九室嘅吉舖，地產股有排捱，都係食下花生做觀眾算數。

麥狄文

(徐狄怡‧證監會持牌人)