即巿股評 | 2020-11-09 13:59

【盤房來料】大市向好唔高追但勿逆市做淡

拜登已有足夠選舉人票入主白宮，即使侵侵未肯承認落敗，但中港兩地股市已熱烈慶祝，加上內地上月出口增速創一年半以嚟最強，港股成功突破二萬六。恒指高開444點，重上26000水平，開市後曾升457點，見26170點，創7月9日以來新高，之後回順，升幅曾收窄至269點，見25982點半日低位。中午收市前升幅再拉闊，恒指中午收報26129點，升416點；國企數報10675點，升177點；恒生科技指數今早高見8524點創新高，半日升4.5%，報8517點。內地股市做好，人民幣強勢支持深滬股市向上，滬指升1.9%；深成指上午高見14188點，創2015年7月以來新高，半日升2.43%，報14174。

藍籌股並唔係全線上升，長和(00001)上星期急升後，今日見回吐，逆市跌2.2%；領展(00823)派完成績表逆市跌2%，本地零售市場疲弱，領展呢一年半載都唔會好得去邊。其他傳統藍籌股普遍上升，中資金融股喺人民幣強勢下，升勢得已保持。

恒科指破頂，皆因喺港股上市嘅科技股，十居其九係中科企，市場相信拜登上台後，美中關係定有改善，中美友誼長又長，好比萬里長城長。拜登未知如何向中國示好，但市場憧憬過往曾被侵侵狙擊嘅中興(00763)及中芯(00981)終能擺脫被美國制裁嘅陰霾，分別升8.8%及6.8%；而內地5G技術或能喺歐美地方重生，5G股受捧；芯片股亦喺中芯帶動下向上，只有一對建滔孖寶逆市下跌。

重磅科技股新高又新高，騰訊(00700)、京東(09618)、美團(03690)齊齊破頂，小米(01810)亦升2.6%、阿里(09988)則反彈3.5%。雙十一購物節步近，其他電商股亦做好，阜博(03738)創新高，半日升20.8%；寶尊電商(09991)創本港上市後新高，半日升8.4%。手機供應鏈股份有資金追捧，舜宇(02382)飆12.1%；丘鈦(01478)升7%；瑞聲(02018)升6.2%；比亞迪電子(00285)升9.7%。如果要揀呢個板塊股份上車，待回吐吸納舜宇或比亞迪電子。

內地股市做好，內地券商股落鑊，板塊內股份閒閒地升超過4%，不過阿Man對呢個板塊好有戒心，高追易中伏，都係眼看手勿動。唔少缸邊友見大市連日上升，之前因擔心大選而減倉覺得倉位好空虛，心思思想追貨，阿Man就認為要戒急用忍，雖然之前都預計無論邊個入主白宮，後市都係向好，但個幾星期港股急升逾2000點，隨時出現回吐，加上要後市健康發展，唔回調都唔妥當，不如吼跌市搵優質股上車，急升市都係靠邊站。不過千祈咪自作聰明逆市做淡，呢啲升勢唔高追亦咪做淡去擋路，逆市而行通常冇好下場。

麥狄文

(徐狄怡‧證監會持牌人)