即巿股評 | 2020-09-29 13:50
人家美股隔晚又升,港股ADR及夜期跟彈些少,可惜今早有高開低走,無咗北水係少咗北水嘅獲利沽盤,但同時又少咗購買力,半日成交額縮到得番458億,反映買賣兩閒。恒指高開108點,最多升125點,見23601點半日高位,亦係近一周高,之後回軟倒跌,半日最多跌118點,見23357點半日低位。恒指中午收報23418點,跌57點;國企指數報9342點,跌40點;恒生科技指數半日升50點,中午收報7029點,重上七千點關口。
藍籌重磅股以金融股表現最差,話咗大笨象(00005)博反彈見好要收,仲有貨要把握跳車機會,今朝曾升至31.4元,升近2%,話咗過到三十一都唔過三十五,半日倒跌1.8%,30元都唔知企唔企得穩。建行(00939)跌至超過四年低位,半日跌1.4%;工行(01398)半日亦跌1.4%,中行(03988)更創自2011年11月低位,半日跌1.2%;交行(03328)半日更跌逾3%。恒大(03333)事件引發市場憂慮內房債務問題,若然內房呢班內銀大債仔有乜冬瓜豆腐,將引發內銀壞帳問題更趨嚴重,內銀股睇款都係弱過藥煲。
科技巨頭今日普遍反彈,騰訊(00700)跟阿里(09988)分別升1.8及1.9%,小米(01810)半日亦升0.7%,ATMX之中只有美團(03690)半日跌0.1%,反覆偏軟。恒大事件陰影仍影響內房股,恒大噚日反彈完,今日又嘔番4%出嚟,其他內房股閒閒地跌2%或以上。《21世紀經濟報道》引述銀行業人士透露,有大行收到通知,監管機構近期要求大型商業銀行壓降、控制個人住房按揭貸款等房地產貸款規模。呢個消息意味住未來內房融資難度增加。體品股今日有資金流入,逆市做好,不過呢個板塊嘅龍頭仍接近年內高位,無乜點大調整過,見升嗰日嚟追貨,又係搵自己笨。
講真過埋明日幾日中秋國慶長假,假日情懷已滿瀉,仲要加埋北水今日開始休息,而明早係美國兩位總統候選人首場辯論會,美股今晚好大機會無乜動靜,等埋睇睇辯論後兩候選人能否分出高下,美股先會再有方向。不過九個牛皮十個淡,港股牛皮得嚟呢期都係偏軟,望就望美股氣氛可持續改善,而下月業績期企業盈利公布有驚喜,否則港股都係吽吽逗逗,難以向上突破,以守代攻去應付美國大選前嘅不確定因素。
麥狄文
(徐狄怡‧證監會持牌人)