港股直擊 | 2020-09-15 11:01

【輪證贏家】「死亡交叉」VS 重近熊街貨

我相信大部份香港人同我都係一樣，今年無得出國旅行嘅同時，公司係要你一如以往的清假(可能有部份公司早喺上半年Work Form Home期間要同事以年假作為Work Form Home嘅日子)，數數手指積咗10幾日年假，望望月曆依家已經9月中，又係開始準備清假，第一炮先攞9月底嗰三日，Well，坊間啲請假攻略係咁教嘅，不過我都係喺屋企做嘢架啦。

勁大雨之下等車，好不容易返到公司，恒指都開咗半個鐘市，依家10點7分，做緊24713點，升73點，拆開恒指5分鐘圖見今朝個市都係喺50點之間範圍上上落落，係10點鐘打後先發忽然發力，可能係同當時出咗內地8月嘅經濟數據有關掛。

先睇恒指牛熊證街貨圖，今日見牛證有三層新增街貨層，最貼價上移至24500至24599點，呢度有相當於60張期指，至於熊證方面最貼價為24700至24799點，呢度有相當於5張期指啫，都明嘅，噚日恒指同騰訊(00700)挾到咁嘅鬼樣。正因為噚日恒指向上殺，將現價同重貨區進一步拉近，目前重貨區喺25000至25099點，呢度有相當於1033張期指，按依家10點20分恒指做緊24754點計，同呢層嘅差距只有246點。

至於睇咗幾日都唔殺嘅牛證重貨區，至依家都仍然存在，喺24100至24199點同24000至24099點呢兩層仍有過千張期指街貨，但同現價比都有600至700點差距，以目前嘅走勢嚟講，點睇都唔會無啦啦向下殺牛證。

依家10點29分，望返恒指日線圖，噚日預計嘅「死亡交叉」終於出現，10天線(24671點)跌穿100天線(24675點)，不過SlowSTC(14,3)仍然勢頭呈上，確實令人有啲費解。

不過，如以一貫走勢計，向近又多貨嘅方向埋手應是大路之選，恒指牛(57000)，收回價24100點，同現價有逾600點差距，逾40倍槓桿雖然同一收回價中唔係最高，但勝在低街貨，唔食到上25000至25099點嗰堆重貨，點都會殺24800至24899點嗰326張期指掛。吼5分鐘圖見超賣小注落場。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

FB/秒投聊天室：輪證贏家