即巿股評 | 2020-03-23 10:36
星期六(3月21日)林鄭六點鐘出嚟講記招,講完一大餐之後,其中一句係話公務員又再home office(好似無講home幾耐,當住佢一個星期先),當晚公司即出email就同2月一樣,再次實行home office,不過我今朝照返公司,做完個上晝就閃人架啦,所以預告定今日無[下半Part],聽日正常。
喺巴士返緊公司時,恒指做完U盤開市,一嚟就跌1145點,開市報21659點。到依家9點45分,返到嚟開晒所有嘢,見到恒指跌幅略為收窄咗少少,跌996點,做緊21808點。
先睇恒指牛熊證街貨圖,首五層街貨已經被今朝過千點嘅大裂口啪死,依家最貼價嘅落到去21600至21699點,呢度有相當於7張期指,係真係得咁多,稍為有啲睇頭嘅要數到落去第七層21000至21099點,呢度有相當於492張期指,重貨區嚟架啦。
至於熊證方面,最貼價為22900至22999點,呢度有相當於265張期指。開恒指熊證搜尋器,將所有恒指熊證LOAD出嚟再按收回價由小至大排序,就會見到依家市場上最貼價嘅熊證,收回價為22905點,換言之,到聽日見熊證最貼價仍然係22900至22999點。
開恒指日線圖睇,其實上個星期四(19日)恒指先跣落去22000點樓下,今日再跣 ,叫做同星期四並排,不過有少少唔同嘅係今日粒恒指繼續處於保歷加通道裡面,但問題係至今仍未見到保歷加通道底部(21366點)有橫行嘅跡象,條線依然都係向下走,連同保歷加通道中軸(24860點)都係一樣,而保歷加通道頂部(28354點)則繼續橫行。再留心啲就會見到保歷加下降通道其實係keep住拓闊中,換言之保歷加通道其實係比位大市下行。
明嘅,咁嘅時勢唔駛條保歷加通道都可以知道大市仍未脫險,而今日見牛熊證街貨仍然係熊證多於牛證(比例約8:2),就算有資金願意博反彈,又就算大市肯彈,但都怪以見到熊證車尾燈。開淡倉仍然係大方向,但亦應按一如以往策略:吼5分鐘圖見超買先落場;另亦可用20000至21000點中間價的恒指界內證作部署。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家