港股直擊 | 2020-02-07 10:54
嚟到第八日home office,如無意外,下個星期一(2月10日)就要 返工,不過,今朝起身見到日本新增個案忽然急升至有86宗,當中有大部份係嚟自嗰條郵輪,困獸鬥就更係易中啦,最怕係社區大爆發啫。
依家9點50分,電視就更係開住我家老爺至愛嘅彭晴啦,噚日已經發現新聞台出咗個新嘅L shape嘅版面,loop住顯示武漢肺炎最新數字同訊息,搞到我無得好似平時咁,抬高個頭等一等就可以見到恒指粒數,Well,呢個時侯就更係武漢肺炎緊要過條恒指啦。
電視無就開住個圖係咁reload睇最新粒數(我都唔係用streaming報價咁豪架!)恒指依家做緊27284點,跌209點。日線圖上噚日下半場恒指爆升多200點後,一度踩過上條50天線,今日見一粒細細嘅陰燭,企喺噚日支陽燭中間,啱呀,假設呢個格局不變,佢就係「身懷六甲」,可惜喺呢啲中間位出現,impact唔大。
睇埋恒指牛熊證街貨圖,見到今日有多四層新增牛證街貨,最貼價上到27000至27999點,呢度有相當於230張期指。至於熊證方面,噚日被大市殺咗幾層之後,今日最貼價層回升至27600至27699點,呢度有相當於261張期指。重新計多次牛熊街貨中間位,即(27600+27099)/2=27349.5點,同頭先mark低嗰口價只係相差64點左右,換言之其實恒指依家同牛熊街貨中間價其實好近。
咁當然啦,用目前嘅牛熊街貨圖睇,點秤都係熊證街貨量多於牛證(以最近四至五層計),但會唔會話個市就企喺中間呢個位唔多郁,就係等大家「買定離手」,到下個星期先再向重貨嚟殺過?唔排除有呢個可能,因為之前都見過。
指數無嘢好玩就更係向個股埋手啦,開到騰訊(00700)日線圖時,咁得意嘅,一睇就睇到「平頂」出現,仲要係喺$400前呢啲關口位,SlowSTC(14,3)就上到6X至7X呢個位置,唔算超買住,但可能今日個市下行,騰訊咁重磅就當然隨市下行,所以連條SlowSTC(14,3)都頭耷耷。
$400呢個位對騰訊嚟講真係咁難過?都未必,之前都破過一次,只係好快就企唔穩,然後再生咗條「下降通道」,只係呢期大市回升,佢借勢再上,上試多次$400呢個關啫,bookmark住先,因為如果上得到$400,短線可以此為支持;但相反上唔到嘅話,咁「平頂」確認,淡倉接力。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家