港股直擊 | 2019-12-19 10:58
噚日繼續再追牛證,原因仍然都係基於市場上暫時仲未有近牛出現,於是就喺噚日朝早大約11點5分至11點25分,恒指5分鐘圖SlowSTC(14,3)落到嚴重超賣水平時,小注買入恒指牛(65363),當時按其高低位計出嘅平均買入價為$0.114。
去到大約下晝1點20分至1點40分,SlowSTC(14,3)重上超買水平,再按(65363)高低位計出平均買入價為$0.1185,計落賺幅就只有3.9%,確實無乜肉食。
不過,愈臨近收市就愈見個市唔多對路,心癢癢、過夜又唔係,唔過夜又無肉食,唔知點算好嘅唔止我一個,結果真係喺臨收市時再出現多次鐘擺,走定唔走呢一鋪就真係視乎個人心態同信心。按尾市15分鐘(65363)高低位做過$0.119/$0.117,平均賣出價$0.118,同下晝點零鐘睇嗰時差唔多,見無起色之下收隊當打個和亦未嘗不可。
今朝早我家老爺比我更早起身,事關一大清早佢要入赤柱影嘢,毛毛雨天本想喺被竇瞓多陣,最後都係醒咗,開電視就見到新聞話美國眾議院仲傾緊彈劾總統特朗普單嘢;到開市後大約20分鐘到,就話已經通過咗,本身恒指今朝早都只係微升24點,開市報27908點咁大把,都唔知係咪呢個消息出爐,恒指就蓬一聲跌過百點,依家10點16分,恒指做緊27789點,跌94點,5分鐘圖上SlowSTC(14,3)已經落到嚴重超賣水平,依家低位反彈返上緊去。
大市今日係唔係借勢回調就唔知,但借乜都好,技術上今日恒指公粒燭的確係走返入去保歷加通道裡面,而日線圖上SlowSTC(14,3)%K線已作勢準備由高位插穿條%D線,如果話恒指升勢就咁就完,就真係言之過早啦,都講過就算一條幾靚嘅「上升通道」都好,當中總會有啲陰燭出現;就正如你心目中嘅「女神」有幾正都好,都總有一兩個缺點/壞習慣,只係你睇唔到啫。
睇埋恒指牛熊證街貨圖,承如噚日所指,喺牛熊證搜尋器搵恒指牛時,已經見到有收回價介乎26600至26699點嘅牛證出現,今日呢層街貨終於有數,有相當於491張期指喺度,不過,就算恒指頭先一度跌過百點,最低暫時(至10點23分止)見27750點,但同呢一層牛證街貨仍然仲有一段距離。
再睇埋熊證,最貼價嘅27900至27999點今日見得返200張期指喺度,至於28000至28299點就仍然都係重貨區,但期指張數都見少咗,得返922張期指,開淡倉嘅資金或者上移至28300至28399點,因為呢一層係最多新增期指張數層。
街貨分布無乜太大變化,唯一小心嘅就真係技術分析出現看淡訊號,雖則話「技術分析VS街貨圖」有九成都係街貨贏,但都唔少忽略技術分析贏嗰一成。若然噚日手持牛證仍未放手嘅,搵機會收割;無貨嘅就休息一日,反正下個星期就已經係聖誕節,諗吓買咩禮物好過啦!
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家