即巿股評 | 2019-07-23 13:06
隔晚美股回升,主要係唔少已派成績表嘅美企,表現好過預期,令市場憧憬呢個星期派成績表嘅科技巨無霸會有理想表現。至於港股噚日急跌近400點後,今日總算靠穩。恒指高開20點,隨即向下跌57點,報28313點為半日低位,其後A股帶動下,恒指最多升114點,見28486點半日高位,不過受制10日線(28489點)及20日線(28510點)滙聚區。中午恒指報收28402點,升30點;國指則報10806點,升36點。
重磅藍籌股個別發展,當中以恒安國際(01044)有大行唱好,半日升5.5%,藍籌之中升幅最大。其次表現最好係中生製藥(01177),半日升3.8%。至於較早前被沽空機構接二連三狙擊嘅安踏體育(02020)發盈喜,股價連升9日,半日再創新高逼近60元,半日升3.4%,中午報收59.25元。阿Man一直睇好安踏,亦表示真金不怕洪爐火,有貨唔怕繼續坐。
除咗安踏之外,申洲國際(02313)亦創新高,中午報收112.4元,升1.6%;粵海投資(00270)半日亦破頂,中午報收16.72元,升0.7%。雖然呢期個市進入悶局,但唔少股份悶市創新高,可見資金係集中買入強勢股。其他重磅股個別發展,騰訊(00700)繼續呆滯,半日無起跌,而友邦(01299)回吐,平保(02318)跟大笨象(00005)則上升。
香港近日嘅政治事件愈演愈烈,周日喺元朗更發生嚴重暴力事件,多名普通市民受傷,市民人身安全受到威脅,反映目前政府嘅管治班子極度不濟,令市民信心盡失。本地投資者亦受影響,港股近日成交持續薄弱,若然連過往被視為全球最安全城市之一嘅香港,治安方面亦開始跌watt,最終亦會禍及樓價向下。地產股呢兩日捱沽,陀地地產股普遍下跌。而涉及沙田及元朗暴力事件嘅商場,均屬於新地(00016)旗下,由於兩次新地商場嘅處理手法,均受到大眾質疑,形象大大受損,呢期都係稍為迴避,要揀地產股都唔好考慮新地。
除咗地產股,零售收租股呢期亦跑輸大市,近個多月嘅政治事件,進一步打擊本來已走弱嘅零售市場,強如領展(00823)亦要跌至超過一個月新低。其他零售股普遍下跌。另有內地傳聞指銀保監將於下半年,對30個城市及75家金融機構開展專項檢查,市場擔心拖累樓市,內房股普遍受壓,半日跌幅由0.7%至3.7%不等。
暫時大市確係無乜睇頭,加上個市不斷窄幅上落,已經磨滅唔少缸邊友意志,而中美貿易關係遲遲未見突破,港股自然舉步為艱。睇款指數都係離唔開28000至29000呢一千點射程範圍。
麥狄文
(徐狄怡‧證監會持牌人 滙盈資產管理‧董事總經理)