« 返回前頁列印

港股直擊 | 2019-04-11 13:23

【盤房來料】手遊股高追博唔過寧食花生

放大圖片

中國上月通脹回升,CPI按年升2.3%,符合預期,但CPI上番2%之上,市場又要擔心通脹升溫,內地股市則向下,拖累港股亦失守30000大關。恒指高開18點後,早段曾升65點,見過半日高位30184點,其他受內地股市跌逾1%所拖累倒跌,最多跌335點,低見29783點。半日收市跌278點,報收29841點;國指則跌134點,報11629點。

騰訊(00700)早段又撐起大市,公司再獲發遊戲版號,股價一度升穿400元,見過超過九個月高位400.4元,半日升勢回順,升幅收窄至0.8%,表現已經好過好多重磅藍籌股。其他重磅股包括友邦(01299)、大笨象(00005)、平保(02318)、建行(00939)同中移動(00941)等,均見下跌,跌幅由0.2%至1.4%不等。而濠賭股跌幅更為顯著,銀娛(00027)跟金沙(01928)分別跌3.4%及2.2%。

騰訊有咁嘅表現,主要係內地廣電總局噚日公布第12批遊戲版號,個別手遊股吸引資金短炒。除咗騰訊之外,博雅互動(00434)升15.3%,而宣布入股VR開發商嘅雲遊(00484)一更爆升25.5%,但IGG(00799)僅升0.2%,力水有限。講真手遊股次次高追都唔會好有結果,今次未知會唔會例外,但既然係咁寧願花生都唔博呢一鋪。至於騰訊呢今次400元目標價到咗,短炒食糊亦無妨,長線嘅就唔建議走嚟走去喇,或者定個止賺價喺385元再坐一會。

今日再有大行報告指中國鐵塔(00788)估值太高,現價再上升空間有限,下調其評級,拖累股價半日跌3.3%。龍頭鐵塔腳軟,其他5G概念股齊齊捱沽,整個板塊全部下跌。手機設備股同樣冇運行,跌幅閒閒地超過3%。

講真大市累計升咗幾千點,嚟到30000點大關要抖抖好正常,況且暫時又未見有特別利好消息刺激,睇嚟呢段時間都係反覆整固。暫時大市重要支持位喺29500點,呢個亦係大市重上好淡分界嘅重要分水嶺。而上半場大市去到29783點就刹車,即係暫時10日線(29715)有啲支持,上得番30200點之上可以再度向上,否則受制30200至30400點阻力,大市都係要整固一下抖抖先。

麥狄文
(徐狄怡‧證監會持牌人 滙盈資產管理‧董事總經理)