即巿股評 | 2019-02-13 11:08

【輪證贏家】恒指牛收割嚟買花

噚日繼續部署隻恒指牛(66749)，喺下晝1點15分至1點20分，恒指5分鐘圖見SlowSTC(14,3)見超賣，呢個時段(66749)嘅高低位為$0.077/$0.075，一如以往用中位數$0.076作為買入價，依家10點9分，恒指由今朝開市升得嗰10零點一直向上爬到依家升158點，依家做緊28329點。至於隻(66749)依家證價做緊$0.093，對比買入價$0.076有17格或22.4%賺幅，唔止報到早兩日港交Put(23790)嘅仇，我相信大家都應該夠買束花比你另一半，事關聽日就係情人節啦，我身邊已經有女同事抱怨男朋友仲未訂枱食飯，各位未訂枱而要訂枱嘅男士，加油呀！(跟手我喺facebook發現有人話某連鎖店粥店有情人節套餐，當中一道菜式為「情不自禁炒米粉」，笑到我癲咗！)

依家10點12分，恒指上到28300點以上之後似乎個勢仲有得去，事關今日開恒指牛熊證街貨圖見到成堆街貨都企晒喺熊個邊，距離現價1000點嘅牛熊證街貨比例為29：71，剛剛28200至28299點嗰968張期指被殺掉之後，28300至28399點呢度有668張期指企喺度等你；再上多兩層，講緊28500至2599點呢度有成1003張期指，暫時見到係熊證重貨區。依家10點16分，恒指做28302點，若然要爬升再食晒重貨區嘅話，只需要彈升多297點就可以，沿路總數可以食到2660張期指，確實係好吸引，唯一大家會擔心嘅係頂頭條250天線(28351點)，依家恒指暫時做過嘅高位28352點計，你都可以話佢叫做穿過嘅，但呢1點對於確定大市「突破」又確實係難咗啲；若然今日稍後時間佢完完全全升穿呢條傳說中嘅「牛熊分界線」嘅話，估計大家都會手執恒指牛/Call等見28500點。

恒指牛(68053)，收回價27600點，同現價有逾700點差距，槓桿偏高低街貨之選，揀住先。

就咁嘅，再阻大家少少時間嘅，就係小妹有幸獲得發行商嘅邀請作為佢哋嚟緊2月26日個Talk嘅Guest Speaker，嗯...有興趣嘅嚟聽吓囉。

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#