港股直擊 | 2019-02-11 11:07

【輪證贏家】生日快樂！

今日初七人日，祝大家生日快樂！今年個新年都好似過得好快，相信大家去親朋好友度拜年都拜得八八九九，噚日我同我家老爺、同事阿Jo齊齊踩上戰友Jack嘅屋企，都應該係今個新年最一級一場拜年地，戰友Jack兩個字：豪宅！(謝謝款待呀！)

連A股都復工，今日都應該有唔少打工仔都開工，唔知係咪放咗咁多日假嘅關係，人就放到呆呆滯滯，個市都係咁喎。恒指今朝開市微跌19點，報27297點；到依家9點59分，恒指確實係跌幅擴大咗，但講緊都只係跌36點，做緊27909點；而本身上個星期五(2月8日)喺[下半part]嗰時講過話想博A股復市高開帶挈埋恒指嘅話，就試吓吼5分鐘圖見超賣落恒指Call(12150)，無嘢可惜，因為成日都無出現過超賣咁滯，所以(12150)落唔到場。

依家10點6分，要返嘅同事都返晒，而見恒指仍然都係跌緊幾十點，個樣好似想就咁悶到收市為止。開恒指牛熊證街貨圖，見到上方熊證最貼價嘅係28000至28099點，呢度有相當於385張期指；而重貨區就係喺28200至28299點，呢度有成1582張期指，同現價(10點1分mark底嘅27950點...咦？倒升喎)相差349點。

如果用返同一個點數(即349點)向下殺落去牛證嘅話，即係27950-349=27601...well，呢一個位置今日暫時未見有街貨喺度，事關牛證最貼價嘅係27500至27599點，呢度有相當於248張期指咁大把。至於重貨區就係喺27100至27199點，呢度有相當於1168張期指，不過同現價嘅距離就真係差好遠。(怪不得個市倒升比你睇啦)

可能有人嫌個市悶得滯，就想向個股埋手，我都係咁話，見小米(01810)悶市發大財咁升3%，搵吓個股睇吓有無運行，搵搵吓就搵咗隻港交所(00388)出嚟。

港交所要成兩個星期後(2月27日)先公布業績，暫且可以不理佢上年做點(要炒佢業績都唔駛咁早部署定)，睇返佢日線圖其實港交所自上年10月11日「終極一跌」，低位見$195後，至今你都可以話以一浪高於一浪嘅形態上行。須知道浪呢家嘢有起亦有跌(如果唔係又點叫浪呢？)，日線圖上依家港交所似係做緊第二個浪，只係剛剛個完成個浪頂，起完啦喎，就係回返落去條支持線之上；留意返，呢條支持線亦都係一條「上升軌」嚟架。而今日港交所粒燭都都一度跌穿條20天線($240.1)/保歷加通道中軸，有無機會碌落去下降通道行？見SlowSTC(14,3)一早已經由超買水平下行、再補多MACD喺牛區見熊差區出現都估到呢個機會都唔細，一旦進一步失守20天線/保歷加通道中軸，下一步可能要試20天線($233.688)或者係保歷加通道底($233.6969)。唯一小心嘅係條20天線有企圖或意圖想升穿條250天線($241.13)，一旦升穿就會形成「黃金交叉」，「呢個乜唔係因為之前升咗咁耐而得出嚟嘅滯後數據咩？」係，你可以咁講，但同時間都會有更滯後嘅錢見到滯後數據先至入去，造成「見『黃金交叉』就會升」嘅現象，所以都要小心就係咁解。

港交Put( 23790)，行使價$237.8，輕微價外Put，高槓桿、低引伸、少街貨、多成交，仲唔開定個5分鐘圖吼落場？小注好啦！

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#