港股直擊 | 2019-01-31 11:21

【輪證贏家】收網兼收爐

依家9點49分，經過三日來「有事WhatsApp，無事退朝」嘅生活之後，朕今日終於都開返少少聲可以返到工(其實我喺公司唔講嘢都得架，只係三日會令人極度眼瞓，以致昏迷嘅藥食晒咁解咋)，但係個喉嚨仍然都係痛，不過見到今朝啲新聞，就算個市未開都知道恒指會隨外圍造好，恒指Call(22355)都應該夠我買多幾盒蛋卷過年(舅父Eric喺個WhatsApp度話「我要蛋卷」嘛)

咩事個市咁膠興？噚晚美國議息嘛，今劑唔加息大家都預咗嘅，但膠興嘅點就在於「刪除進一步加息措詞」，正所謂「一石激起千重浪」就係呢句說話對噚晚美股升逾400點收市，同今朝早日經升逾200點，就連我老細都係WhatsApp group度罕有地叫同事出push。

今朝喺巴士度見恒指U盤做完，開27842點，升200點到；至依家9點59分，恒指高位暫見27928點，噚日講過話大家都好在意嘅27800至27899點嗰堆熊證重貨已經全數被打靶，而呢度有相當於2335張期指，比噚日見到嘅仲要多550張，而27900至27999點呢度都有1081張期指坐鎮，但就真係唔知坐得幾耐。至於隻(22355)，截至依家10點2分止，高低位做過$0.068/$0.062，拉個中間數就係$0.065，同早兩日平均買入價$0.057比有14%賺幅，不過今次都真係喺怕個市到高位之下再Call多一下嘅收成嚟嘅，所以動作要快就係咁解。

至於你話個市仲會唔會向上抽多一下，如果按恒指牛熊證街貨圖嚟講，以目前現價27825點計，就的確係有可能，事關依家熊證重貨區只係第二貼價嘅28000至28099點，呢度有相當於1855張期指。至於下方牛證唔係話無貨，但講緊最貼價嘅係27100至27199點，呢度嗰1018張期指要個市由現價向下行725點先可以去到。咁當然唔係話個市唔跌啦，只係現水平似乎要搵一個理由令個市急轉彎得咁緊要，好似難啲囉。

Any肥，餬就食咗啦，(22533)亦當係狗年最後一個trade，年三十得半日市，所以嚴格嚟講依家距離農曆新年就只有2.5個交易日(計埋今日)，相信好多人比我更早收爐。

小妹在此預祝各位戰友們新年進步！三財入庫！最緊要身體健康！千祈唔好好似我咁，一係唔病，一病就大大鑊嗰隻呀！同時都好感謝過去一年大家咁支持【輪證贏家】同【下半part】；「最想多謝係邊個？」咁就梗係我老媽啦，聽日仲要係佢牛一添喎，求吓大家比啲掌聲我老媽之餘，都比少少掌聲我，係呀，係我呀，因為老媽你過埋聽日生日就夠秤被我報稅啦！做咗十幾年嘢終於都可以填老爸同老媽兩個名喺報稅表啦！

下星期五，年初四(2月8日)再見！

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#