港股直擊 | 2019-01-30 10:46

【輪證贏家】大市回落至「上升通道」底

依家8點59分，平時呢個鐘數就準備出門口搭巴士返工，咩事呢個鐘數我可以打到稿？咪就係繼續Home Office囉，聲已經開到啲，喉嚨亦都無咁腫(我feel到個喉嚨對落喺有返條通道喺度嘅)，只係勁痛同勁痛，吞啖口水都痛，連打喊路都變得好奢侈。呢個moment我無咩求，只求可以係過年前好番(而我仲有一日藥食，仲未好就明早再仆落去睇多次醫生)。

恒指剛剛開始trade U盤，係未正式開市之前就睇返噚日下半晝發生咩事先，拆5分鐘圖見到恒指喺噚日朝早做過全日低位27328點，之後就用咗成個下晝嘅時間去拗腰上，就連隻恒指Call(22355)都同市彈返上去，噚日就收$0.055，比平均買入價低咗兩格，總算守得住。

望望月曆今日就係期結啦，往往期結日都係做好嘅(雖則無話一定)，至於下個星期一(2月4日)就已經係年三十啦，換言之極有可能過埋今日(甚至係今朝)之後，大市就開始發吽逗收爐，所以(22355)呢段時間真係有得執嘅，就真係唔使同佢客氣，執咗先啦。

講起農曆年底，又係「開紅盤之買定離手」嘅時間，雖然無話新年一定要開個紅盤出嚟，但係呢個係農曆新年嘛，開紅盤就等同攞個意頭出嚟差唔多，換言之開始有投資者會視農曆新年第一日開紅盤係個「習俗」。好粗略同好快咁計一計過去10年農曆新年首個交易日係點嘅先，由2008年到依家，當中有六年喺第一日出現高收，比例為60%；而如果要高開又高收嘅話，10年當中只有三年係咁，命中率得30%，咁都高過抽中居屋嘅。統計上就係咁計啦，追唔追紅盤就真係要睇實際情況。

依家9點34分，恒指開市無幾耐，日線圖暫呈實心陰燭，即係高開低收跌市格局，現價27445點，跌85點。不過見恒指喺日線圖上已經形成咗條「上升通道」出嚟，今日再跌啲啲，又剛好回咗落去條「上升通道」底喎，(22355)食唔食得出，就真係要靠條「上升通道」底同10天線(27230點)有幾強啦。

開埋個恒指牛證證街貨圖睇，上方熊證都有兩行新增嘅熊仔，分別係27600至27699點，同埋27700至27799點，呢兩層街貨唔算多，夾埋先得一百零幾張期指。至於下方牛證最貼價嘅係27100至27199點，呢度有619張期指。以現價計就更係近上方嘅熊證啦，不過就要個市比返多少少力，推到上27800至27899點呢度先有肉食，事關呢一層已經係熊證重貨區，有相當1785張期指駐守，希望隻(22355)可以幫補到大家過年啦。

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#